مسلم امہ کے مسائل کا حل وحدت اور اتحاد میں ہے، انتہا پسندی اور دہشت گردی کے خاتمے کیلئے علما اسلام ہر سطح پر نمایاں خدمات سرانجام دے رہے ہیں۔طاہر محمود اشرفی

لاہور۔1مئی (اے پی پی):چیئرمین پاکستان علما کونسل و سیکرٹری جنرل انٹرنیشنل تعظیم حرمین شریفین کونسل حافظ محمد طاہر محمود اشرفی نے کہا ہے کہ مسلم امہ کے مسائل کا حل وحدت اور اتحاد میں ہے ، کشمیر اور فلسطین امت مسلمہ کے بنیادی مسائل ہیں جن کے حل کیلئے عملی اقدامات کی ضرورت ہے ۔ انتہا پسندی اور دہشت گردی کے خاتمے کیلئے علما اسلام ہر سطح پر نمایاں خدمات سرانجام دے رہے ہیں۔ سوڈان کے مسئلے پر سعودی عرب کا کردار قابل تحسین ہے۔ پیر کو جاری بیان میں طاہر محمود اشرفی نے کہا کہ امت مسلمہ کی وحدت اور اتحاد ہی امت مسلمہ کے مسائل کا حل ہے ۔ اسلامو فوبیا کے خاتمے کیلئے تمام مذاہب کی قیادت سے بات چیت وقت کی ضرورت ہے۔

رابطہ عالم اسلامی مکہ مکرمہ کا میثاق مکہ اور پاکستان کے مذہبی قائدین کا پیغام پاکستان اسلامی تعلیمات کی حقیقی ترجمانی ہے اور اس سلسلہ میں شیخ الازہر کی خدمات قابل تحسین ہیں۔ اسلام امن و سلامتی کا دین ہے اور انتہا پسندی اور دہشت گردی کے رویوں کو کسی صورت قبول نہیں کرتا۔ انہوں نے کہا کہ ایران سعودی عرب اور عرب شام تعلقات کی بحالی سے امت مسلمہ کے مسائل کے حل میں مدد ملے گی ۔ انہوں نے جی20 ممالک کی سیاسی اور مذہبی قیادت سے اپیل کی کہ وہ ہندوستان میں ہونے والے جی20کے اجلاس میں شریک نہ ہوں۔

انہوں نے کہاکہ ہندوستان میں جس طرح سے اقلیتوں کے حقوق کو غصب کیا جا رہا ہے اور مسلمانوں سمیت تمام اقلیتوں پر مظالم کیے جا رہے ہیں وہ اس بات کا تقاضہ کرتے ہیں کہ جی20 کے ممالک اور قیادت ہندوستان کو پابند کرے کہ وہ مقبوضہ کشمیر سمیت ہندوستان میں ہونے والے مظالم کو بند کرے۔ انہوں نے کہا کہ ہمیں امید ہے کہ تمام مذاہب کی قیادت ہندوستان کے اقلیتوں پر مظالم اور مقبوضہ کشمیر کے حوالے سے عالمی قراردادوں کو سامنے رکھتے ہوئے کسی بھی صورت مقبوضہ کشمیر میں کسی اجلاس کی تائید نہیں کریں گے۔

انہوں نے کہا کہ سوڈان کی صورتحال انتہائی تشویشناک ہے ، سوڈان سے غیر ملکیوں کے انخلا کے حوالے سے سعودی عرب کا کردار قابل فخر ہے ۔ اقوام متحدہ ، اسلامی تعاون تنظیم اور تمام دنیا کے اہم ممالک اور قوتوں سے مطالبہ کرتے ہیں کہ وہ سوڈان میں جنگ بندی اور معاملات کی اصلاح کیلئے سعودی عرب کا ساتھ دیں۔طاہر محمود اشرفی نے کہا کہ توہین مذہب اور توہین ناموس رسالت کے قانون کا غلط استعمال کسی بھی صورت نہیں ہونا چاہیے اور نہ ہی اس کی اجازت دی جا سکتی ہے۔

Short Link: https://urdu.app.com.pk/urdu/?p=361592