اسلام آباد۔5فروری (اے پی پی):جیل میں بند کشمیری رہنما یاسین ملک کی اہلیہ مشعال حسین ملک نے یوم یکجہتی کشمیر 5 فروری 2025 بدھ کو مسئلہ کشمیر پر عالمی برادری کی خاموشی کو تنقید کا نشانہ بناتے ہوئے مقبوضہ کشمیر میں انسانی حقوق اور بین الاقوامی قوانین کی بھارت کی صریح خلاف ورزی کی مذمت کی۔ ایک نجی نیوز چینل کو انٹرویو دیتے ہوئے مشعال ملک نے مقبوضہ کشمیر میں بھارت کی ظالمانہ پالیسیوں اور انسانی حقوق کی صریح خلاف ورزیوں کی مذمت بھی کی۔
انہوں نے بھارت کے "کالے قوانین”پبلک سیفٹی ایکٹ اور آرمڈ فورسز اسپیشل پاورز ایکٹ کی مذمت کی جن سے کشمیریوں کے خلاف جبر اور تشدد جاری ہے۔ مشعال ملک نے کشمیری رہنماؤں اور کارکنوں کی حالت زار پر روشنی ڈا لتے ہوئے کہا کہ ان کو آواز بلند کرنے کی وجہ سے قید یا شہید کیا گیا ہے اور اس طرح کی آوازوں کو خاموش کیا جا رہا ہے۔
انہوں نے مقبوضہ کشمیر میں بھارت کی ریاستی سرپرستی میں ہونے والی دہشت گردی کو تنقید کا نشانہ بنایا، جہاں سیکورٹی فورسز پر ماورائے عدالت قتل، جبری گمشدگیوں اور انسانی حقوق کی دیگر خلاف ورزیوں میں ملوث ہیں۔ انہوں نے عالمی برادری پر زور دیا کہ وہ اپنی خاموشی توڑے اور بھارت کو کشمیر میں ہونے والے مظالم کا ذمہ دار ٹھہرائے۔
انہوں نے خبردار کیا کہ اگر عالمی برادری مقبوضہ کشمیر میں بھارتی مظالم کے خلاف آواز اٹھانے میں ناکام رہی تو کشمیری عوام قانون کو اپنے ہاتھ میں لینے پر مجبور ہو جائیں گے۔ انہوں نے خبردار کیا کہ بھارت کی بلا روک ٹوک جارحیت اور انسانی حقوق کی خلاف ورزیوں نے پوری وادی میں عوام پریشان ہیں۔ کشمیریوں میں ناامیدی اور مایوسی مزاحمت اور عسکریت پسندی میں اضافے کا باعث بن سکتی ہے۔
مشعال ملک نے اس بات پر زور دیا کہ بین الاقوامی برادری کی خاموشی مداخلت کے مترادف ہے اور یہ ان کی ذمہ داری ہے کہ وہ بھارت کو اس کے اقدامات کا جوابدہ ٹھہرائیں۔انہوں نے کشمیریوں کے اپنے جمہوری حق خود ارادیت کے مطالبے کا اعادہ کرتے ہوئے عالمی برادری پر زور دیا کہ وہ آزادی اور انصاف کے لیے ان کی جدوجہد کی حمایت کرے۔
انہوں نے اس بات پر بھی زور دیا کہ کشمیریوں کو ان کے مستقبل کا فیصلہ کرنے کے بنیادی حق سے محروم رکھا گیا ہے اور بھارت کے قبضے کی وجہ سے کئی دہائیوں سے مصائب، جبر اور انسانی حقوق کی پامالی ہوئی ہے۔ مشعال حسین ملک نے عالمی برادری سے اپیل کی کہ وہ کشمیریوں کے حق خودارادیت کو تسلیم کرے جو اقوام متحدہ کے چارٹر مطابق ہے اور اقوام متحدہ کی متعدد قراردادوں میں بھی کشمیریوں سے اس کا وعدہ کیا گیا ہے۔
