امریکا۔9اپریل (اے پی پی):ملک بدری کے احکامات کے باوجود امریکا نہ چھوڑنے والوں کو یومیہ 998 ڈالر جرمانہ ہوگا۔ العربیہ اردو کے مطابق ملک بدری کے حکم سے مشروط تارکین وطن کو یومیہ998 ڈالرجرمانہ کیا جائے گا اگر وہ امریکا نہیں چھوڑتے اور جرمانہ ادا نہیں کرتے ہیں تو ان کی جائیداد ضبط کر لی جائے گی۔یہ جرمانے 1996کے اس قانون پر مبنی ہیں جو ٹرمپ کی پہلی صدارتی مدت کے دوران 2018 میں پہلی بار نافذ کیا گیا تھا۔
امریکی انتظامیہ کے ایک سینئر اہلکار نے نام ظاہر نہ کرنے کی شرط پر بتایا کہ ٹرمپ انتظامیہ پابندیوں کو پانچ سال تک کے لئے لاگو کرنے کا ارادہ رکھتی ہے ۔رائٹرز کے سوالات کے جواب میں ہوم لینڈ سکیورٹی کے محکمے کی ترجمان ٹریسیا میک لافلن نے کہا کہ غیر قانونی طور پر امریکا میں مقیم تارکین وطن کو خود کو ڈی پورٹ کرنے کے لئے سی پی پی ہوم موبائل ایپ کا استعمال کرنا چاہیے ۔
انہوں نے کہاکہ اگر وہ ایسا کرنے میں ناکام رہتے ہیں تو انہیں نتائج کا سامنا کرنا پڑے گا۔ اگر وہ ملک نہیں چھوڑتے تو انہیں یومیہ کے حساب سے998 ڈالرکا جرمانہ ہوگا۔ٹرمپ نے جنوری میں اقتدار سنبھالنے کے بعد امیگریشن کے خلاف کریک ڈاؤن شروع کیا تھا۔منصوبہ بند جرمانے کا ہدف تقریباً 14 لاکھ تارکین وطن ہیں جنہیں امیگریشن جج نے ملک بدر کرنے کا حکم دیا ہے۔
Short Link: https://urdu.app.com.pk/urdu/?p=579849
