راولپنڈی۔10اپریل (اے پی پی):ملک میں کھیلوں کے سب سے بڑے میلے پاکستان سپر لیگ ( پی ایس ایل) سیزن 10 کا آغاز (کل) بروز جمعہ سے راولپنڈی میں ہو گا۔ راولپنڈی کرکٹ سٹیڈیم پہلی بار پی ایس ایل کی افتتاحی تقریب کی میزبانی کرے گا۔ تقریب شام 7 بجے شروع ہو گی جس میں عالمی شہرت یافتہ سروں کی ملکہ اور صوفیانہ کلام کی مایہ ناز گلوکارہ عابدہ پروین اپنے فن کا مظاہرہ کریں گی۔ ان کے علاوہ معروف گلوکار علی ظفر، ابرار الحق، نتاشا بیگ اور طلحہٰ انجم بھی پرفارم کریں گے۔ ٹورنامنٹ کا افتتاحی میچ دفاعی چیمپئن اسلام آباد یونائیٹڈ اور دو مرتبہ کی فاتح لاہور قلندرز کے درمیان کھیلا جائے گا جس کی پہلی گیند رات 8.30 بجے کی جائے گی۔
پی سی بی کے مطابق 6 ٹیموں کے مابین 11 اپریل سے 18 مئی تک 34 میچز کھیلے جائیں گے جس میں لاہور کا قذافی سٹیڈیم 13 میچوں کی میزبانی کرے گا جن میں دو ایلیمنیٹرز اور فائنل شامل ہیں۔ راولپنڈی سٹیڈیم میں کوالیفائر ون سمیت 11 میچ کھیلے جائیں گے جبکہ نیشنل بینک سٹیڈیم، کراچی اور ملتان سٹیڈیم پانچ ، پانچ میچوں کی میزبانی کریں گے۔ ٹورنامنٹ میں تین ڈبل ہیڈرز بھی شامل ہیں جس میں دو میچ ویک اینڈ ہفتہ اور ایک قومی تعطیل یوم مئی پر ہو گا۔ کراچی کنگز جو پانچویں ایڈیشن کی فاتح ہے 12 اپریل کو گزشتہ ایڈیشن کی رنر اپ ملتان سلطانز کے خلاف اپنی مہم کا آغاز کراچی سے کرے گی۔
ملتان سٹیڈیم میں لیگ کا پہلا میچ 22 اپریل کو چھٹے ایڈیشن کی چیمپئن ملتان سلطانز اور لاہور قلندرز کے مابین کھیلا جائے گا۔ قذافی سٹیڈیم لاہور میں پی ایس ایل کا پہلا میچ 24 اپریل کو کھیلا جائے گا جس میں ساتویں اور آٹھویں ایڈیشن کی فاتح ٹیم لاہور قلندرز کا مقابلہ پشاور زلمی سے ہو گا۔ پشاور زلمی اپنے پانچ میچ راولپنڈی سٹیڈیم میں کھیلے گی جبکہ چوتھے ایڈیشن کی فاتح ٹیم کوئٹہ گلیڈی ایٹرز قذافی سٹیڈیم میں پانچ میچ کھیلے گی۔
پی ایس ایل کے چیف ایگزیکٹو آفیسر سلمان نصیر کا کہنا ہے کہ پی ایس ایل کے تاریخی دسویں ایڈیشن کے لیے بہت پرجوش ہیں۔ پی ایس ایل ایک عالمی سطح پر تسلیم شدہ ٹورنامنٹ بن گیا ہے جس میں پاکستان کرکٹ ٹیم نے بہترین صلاحیتوں کا مظاہرہ کیا ہے۔ رواں سال کے ٹورنامنٹ میں شائقین نہ صرف ہائی پروفائل بین الاقوامی کرکٹرز کو کھیلتا دیکھیں گے بلکہ چار بڑے شہروں کراچی، لاہور، ملتان اور راولپنڈی میں 34 زبردست میچز بھی دیکھیں گے۔ ٹورنامنٹ کا فائنل 18 مئی کو قذافی سٹیڈیم، لاہور میں کھیلا جائے گا۔
Short Link: https://urdu.app.com.pk/urdu/?p=580132
 سیزن 10 کا آغاز (کل) سے راولپنڈی میں ہو گا){kind=link}