میئر کراچی بیرسٹر مرتضی وہاب کی ایرانی قونصل جنرل سے ملاقات ، ایرانی صدر ابراہیم رئیسی، وزیر خارجہ اور دیگر کے انتقال پر تعزیت کی

کراچی۔ 23 مئی (اے پی پی):میئر کراچی و ترجمان حکومت سندھ بیرسٹر مرتضی وہاب نے ایرانی قونصل خانے پہنچ کر ایرانی قونصل جنرل اور دیگر عملے سے ملاقات کی۔ جمعرات کو جاری اعلامیہ کے مطابق ملاقات میں میئر کراچی نے ایرانی صدر ابراہیم رئیسی، ایرانی وزیر خارجہ اور دیگر کے ہیلی کاپٹر کے المناک حادثے میں جاں بحق ہونے پر تعزیت کی۔ انہوں نے کہا کہ ایرانی صدر ابراہیم رئیسی اور دیگر افراد کے ہیلی کاپٹر حادثے میں جاں بحق ہونے پر دلی دکھ ہوا ہے، یہ بہت بڑا حادثہ ہے جس پر ہمیں دلی صدمہ پہنچا ہے۔

بیرسٹر مرتضی وہاب نے کہا کہ دکھ کی اس گھڑی میں پاکستانی قوم ایران کے شانہ بشانہ ہے، ایران اور پاکستان کے درمیان دیرینہ تعلقات ہیں ہم ایک دوسرے کے بھائی ہیں، ایرانی صدر ابراہیم رئیسی ہمارے لئے محترم شخصیت تھے جو اب ہمارے درمیان نہیں ہیں۔ میئر کراچی نے مرحوم ایرانی صدر کے ایصال ثواب اور ان کے درجات کی بلندی کے لیے دعا بھی کی۔ انہوں نے قونصل خانے میں تعزیتی کتاب میں تعزیتی کلمات بھی درج کیے۔

Short Link: https://urdu.app.com.pk/urdu/?p=468384