اسلام آباد۔8اپریل (اے پی پی):پاکستان اور آذربائیجان کے درمیان دوطرفہ اقتصادی تعاون کو مضبوط بنانے کے لئے جاری کوششوں کو تیز کرنے کے لئے نائب وزیر اعظم اور وزیر خارجہ سینیٹر محمد اسحاق ڈار اور آذربائیجان کے وزیر برائے اقتصادیات میکائل جباروف کے درمیان منگل کو یہاں ایک اعلیٰ سطح کی ملاقات ہوئی۔
ترجمان دفتر خارجہ کی جانب سے جاری بیان کے مطابق بات چیت میں دونوں برادر ملکوں نے تجارت، سرمایہ کاری اور طویل المدتی اقتصادی تعاون کو بڑھانے کے لئے مشترکہ عزم کا اعادہ کیا۔ پاکستانی وفد نے وزیر میکائل جباروف کا شکریہ ادا کیا اور ان کی قیادت اور پاکستان اور آذربائیجان اقتصادی تعلقات کو مزید بڑھانے کے لئے لگن کا اظہار کیا جن میں اعلیٰ ترقی کی صلاحیت موجود ہے۔
بیان کے مطابق آذربائیجان کے صدر اور وزیراعظم پاکستان کی ذاتی دلچسپی اور رہنمائی دونوں ممالک کے درمیان مضبوط سیاسی عزم کو ٹھوس اقتصادی شراکت داری میں تبدیل کرنے میں ایک محرک کے طور پر کام کرتی رہتی ہے۔ بیان کے مطابق وزیر اعظم پاکستان کے حالیہ دورہ آذربائیجان کے بعد سے دونوں فریق تندہی سے کام کررہے ہیں جس نے سرمایہ کاری کے اہم منصوبوں پر بھرپور توجہ مرکوز کی ہے، اس رفتار کو دونوں ممالک کے متعلقہ حکام کے درمیان مسلسل مصروفیت بشمول سپیشل انوسٹمنٹ فیسیلیٹیشن کونسل جیسے پلیٹ فارمز کے ذریعے برقرار رکھا گیا ہے جس میں حکومت سے حکومت اور بزنس ٹو بزنس تعاون پر خاص زور دیا گیا ہے۔
ملاقات میں ترجیحی منصوبوں خاص طور پر انفراسٹرکچر، توانائی اور آئی ٹی جیسے شعبوں کو تیزی سے آگے بڑھانے پر زور دیا گیا جو وسیع تر اقتصادی اقدامات کے لیے اہم کردار ادا کرسکتے ہیں۔ ایک ایسے موقع پر جب دونوں فریقین ممکنہ مشترکہ منصوبوں اور اسٹریٹجک سرمایہ کاری کو تلاش کر رہے ہیں بات چیت میں سبز توانائی میں ابھرتے ہوئے مواقع پر بھی تبادلہ خیال کیا گیا۔ بیان کے مطابق پاکستان کی وزارت تجارت نے ایک جامع روڈ میپ بھی تیار کیا ہے جس کا مقصد دو طرفہ تجارتی حجم کو بڑھانا اور تعاون کے شعبوں کو متنوع بنانا ہے۔
اس میں دونوں ممالک کے کاروباروں اور سرمایہ کاروں کے لئے زیادہ سازگار ماحول پیدا کرنے کے لئے قابل عمل اقدامات شامل ہیں۔ بیان میں مزید کہا گیا ہے کہ آذربائیجان کے صدر کے آئندہ دورہ پاکستان کے دوران متعدد معاہدوں اور مفاہمت کی یادداشتوں پر دستخط کئے جائیں گے جو دوطرفہ تعاون کو آگے بڑھانے کے لئے ایک اہم سنگ میل ثابت ہوں گے۔ دونوں فریقوں نے اپنے دوطرفہ تعلقات کی مکمل صلاحیت کو کھولنے اور دونوں ممالک کے لئے پائیدار اقتصادی ترقی اور خوشحالی کو فروغ دینے کے لئے مل کر کام جاری رکھنے کے عزم کا اعادہ کیا۔
Short Link: https://urdu.app.com.pk/urdu/?p=579554
