اسلام آباد۔30جنوری (اے پی پی):نائب وزیراعظم اور وزیر خارجہ سینیٹر محمد اسحاق ڈار نے پاکستان اور ترکیہ کے درمیان تجارتی، اقتصادی اور سرمایہ کاری کے تعاون کو بڑھانے کے لیے ایک جامع روڈ میپ تیار کرنے کے لیے دوسرے اجلاس کی صدارت کی۔
جمعرات کو دفتر خارجہ کے مطابق اجلاس میں بجلی، فوڈ سکیورٹی اور پٹرولیم کے وفاقی وزراء، وزیر اعظم کے خارجہ امور کے معاون خصوصی، وزیر اعظم کے کوآرڈینیٹر برائے صحت اور سیکرٹری خارجہ کے علاوہ وفاقی سیکرٹری اقتصادی امور، مواصلات، صنعت، فوڈ سکیورٹی اور دیگر حکام نے شرکت کی۔
نائب وزیراعظم نے سٹریٹجک اکنامک فریم ورک 2020-24 کے تحت مکمل اور جاری اقدامات پر پیشرفت کا جائزہ لیا۔ انہوں نے اسلام آباد میں منعقد ہونے والے اعلیٰ سطحی سٹریٹجک تعاون کونسل کے ساتویں اجلاس کے موقع پر نو جوائنٹ ورکنگ گروپس اور پاکستان ترک بزنس فورم کے اجلاسوں کی تیاری پر تبادلہ خیال کیا۔
Short Link: https://urdu.app.com.pk/urdu/?p=553903
