نگران وزیر اعلی محسن نقوی سے ا مریکی سفیر ڈونلڈ بلوم کی ملاقات،دوطرفہ تجارت و سرمایہ کاری بڑھانے سمیت مختلف امور پر تبادلہ خیال

لاہور۔6ستمبر (اے پی پی):نگران وزیر اعلی پنجاب محسن نقوی سے ا مریکہ کے سفیر ڈونلڈ بلوم نے وزیر اعلی آفس میں ملاقات کی جس میں باہمی دلچسپی کے امور،دوطرفہ تجارت و سرمایہ کاری بڑھانے کے مواقع،زراعت، سیاحت، تاریخی عمارتوں کی بحالی کے حوالے سے تعاون کو فروغ دینے پر تبادلہ خیال کیا گیا۔

وزیر اعلی محسن نقوی نے امریکی سفیر سے گفتگو کرتے ہوئے کہا کہ پاکستان اور امریکہ کے درمیان تعلقات کثیر الجہت نوعیت کے ہیں،پنجاب اور کیلیفورنیا کو سسٹر اسٹیٹس قرار دینے کے معاہدے کے تحت تجارتی ومعاشی تعلقات کو فروغ دینا چاہتے ہیں اور زراعت خصوصا سیڈ ڈویلپمنٹ کے حوالے سے کیلیفورنیا کے تجربے سے استفادہ کرنا چاہتے ہیں،پنجاب میں تاریخی عمارتوں کی بحالی کے حوالے سے امریکی تعاون کا خیرمقدم کرتے ہیں۔

وزیراعلی محسن نقوی نے لاہور میں تعینات ہونے والی امریکی قونصل جنرل کرسٹن ہاکنزکو ذمہ داریاں سنبھالنے پر مبارکباد دی اور ان کے لیے نیک خواہشات کا اظہار کیا۔امریکی سفیر نے امریکہ پاکستان اقتصادی تعلقات اور باہمی دلچسپی کے دیگر شعبوں میں تعاون کو وسعت دینے کے عزم کا اعادہ کیا-امریکی سفیر نے کہا کہ پنجاب حکومت کے ساتھ مختلف شعبوں میں جاری تعاون کو مزید فروغ دیں گے۔

لاہور میں تعینات امریکی قونصل جنرل کرسٹن ہاکنز،پولیٹیکل اینڈ اکنامک چیف نکولیس کٹساکیس ،پولیٹیکل اینڈ اکنامک آفیسر ڈگلس جانسٹن اور پولیٹیکل سپیشلسٹ صدف سعد،صوبائی وزیر اطلاعات عامرمیر،انسپکٹر جنرل پولیس ڈاکٹر عثمان انور،ڈی جی لاہور والڈ سٹی اتھارٹی کامران لاشاری،چیف ایگزیکٹو آفیسر سینٹرل بزنس ڈسٹرکٹ اتھارٹی اورسیکرٹری وزیراعلی بھی اس موقع پر موجود تھے-

Short Link: https://urdu.app.com.pk/urdu/?p=387690