لاہور۔10ستمبر (اے پی پی):نگران وزیر ریلوے شاہد اشرف تارڑ نے اتوار کے روز ریلوے ہیڈکوارٹرز کا دورہ کیا،نگران وزیر ریلوے کو ادارے کی کارکردگی، اصلاحات اور مستقبل کے منصوبوں پر بریفنگ دی گئی۔چیئرمین ریلوے، سی ای او ریلوے، آئی جی ریلوے پولیس، پرنسپل افسران بھی اس موقع پر موجود تھے۔ وفاقی وزیر نے اس موقع پر انتظامیہ کو ہدائت کی کہ رابطہ ایپلی کیشن کے انٹرفیس کو صارف دوست بنایا جائے،عوامی مفاد میں منصوبوں کی جلد از جلد تکمیل کو یقینی بنا یا جائے۔ ریلوے کی عظمت رفتہ کی بحالی کا عزم ہے، محفوظ سفر پہلی ترجیح ہے۔
وزیر ریلوے نے انتظامیہ کو ٹریک مٹیریل چوری کی روک تھام یقینی بنانے کی بھی ہدایت کی۔ انہوں نے کہا کہ وسائل کا موثر اور شفاف استعمال کیا جائے اورریلوے کی آمدن بڑھانے کیلئے بزنس پلان پیش کیا جائے، شاہد اشرف تارڑ نے مزید کہا کہ ریڈنڈنٹ ٹریک کی حفاظت یقینی بنائی جائے اور ریلوے نیٹ ورک کی شمسی توانائی پر منتقلی کی پیش رفت رپورٹ وزارت میں جمع کروائی جائے۔ انہوں نے ریلوے افسران سے کہا کہ فریٹ آمدن بڑھانے کے لئے اقدامات کیے جائیں، وزیر ریلوے نے کہا کہ سگنل سسٹم کی بہتری پر توجہ مرکوز کی جائے،ناقابل استعمال کوچز اور لوکوموٹوز کو ڈسپوز آف کرنے کا پلان پیش کیا جائے۔
انہوں نے کہا کہ تنخواہ، پنشن کی بر وقت ادائیگی کیلئے ذاتی نگرانی کروں گا،ریلوے پولیس کانسٹیبل کی پوسٹ کو گریڈ سات میں اپ گریڈ کرنے کا فیصلہ کیا گیا ہے ۔ انہوں نے کہا کہ ٹرین حادثہ کی صورت میں سخت ایکشن لیا جائے گا۔وزیر ریلوے نے مغلپورہ ورکشاپ لاہور کا بھی دورہ کیا۔ انہوں نے ورکشاپ کی ورکنگ، کارکردگی پر تفصیلی بریفنگ لی اورورکشاپ کی آوٹ پٹ، آمدن میں اضافے کیلئے بزنس ماڈل پیش کرنے کی ہدایت کر دی۔
Short Link: https://urdu.app.com.pk/urdu/?p=388754
