اسلام آباد۔14نومبر (اے پی پی):نگراں وزیراعظم انوار الحق کاکڑ نے اوور سیز پاکستانیوں کو اپنی رقوم روشن ڈیجیٹل پاکستان اکائونٹ کے ذریعے منتقل کرنے کی ترغیب دیتے ہوئے کہا ہے کہ ترسیلات زر کی قانونی اور محفوظ ذریعے سے منتقلی ملکی ترقی کے لئے انتہائی اہم ہے، اوورسیز پاکستانیز پاکستان میں سرمایہ کاری کریں، حکومت انہیں ہر ممکن مدد اور سہولت فراہم کرے گی۔ منگل کو وزیراعظم آفس کے میڈیا ونگ سے جاری بیان کے مطابق نگراں وزیراعظم انوار الحق کاکڑ سے نعمان مصطفیٰ کی سر براہی میں اوورسیز پاکستانیز کے وفد نے ملاقات کی۔
اس موقع پر گفتگو کرتے ہوئے وزیراعظم نے کہا کہ بیرون ملک مقیم پاکستانی ہمارا قیمتی اثاثہ ہیں ، ملکی معیشت میں اوورسیز پاکستانیوں کا کلیدی کردار ہے ۔ انہوں نے کہا کہ بیرون ملک مقیم پاکستانیوں کی ترسیلات زر کی قانونی اور محفوظ ذریعے سے منتقلی ملکی ترقی کے لئے انتہائی اہم ہے، روشن ڈیجیٹل پاکستان اکائونٹ رقوم کی منتقلی کا محفوظ ذریعہ ہے جس کے استعمال سے ملکی معیشت کی بہتری میں کردار ادا کیا جا سکتا ہے۔
انہوں نے کہا کہ اوورسیز پاکستانیز پاکستان میں سرمایہ کاری کریں، حکومت انہیں ہر ممکن مدد اور سہولت فراہم کرے گی، اوورسیز پاکستانیز کی سرمایہ کاری اور ان کی جائیداد وں کی حفاظت حکومتی ذمہ داری ہے اس سلسلے میںکو تاہی کی گنجائش نہیں ، اوورسیز پاکستانیوں کے حقوق کا تحفظ حکومت کی اولین ترجیحات میں شامل ہے۔
