وزیراعظم شہبازشریف کی سہ ملکی سیریز میں قومی ٹیم کی جنوبی افریقہ کے خلاف تاریخی فتح پر قوم کو مبارکباد

اسلام آباد۔12فروری (اے پی پی):وزیراعظم محمد شہباز شریف نے سہ ملکی ون ڈے انٹرنیشنل کرکٹ سیریز میں قومی ٹیم کی جنوبی افریقہ کے خلاف تاریخی فتح پر قوم کو مبارکباد دیتے ہوئے امید ظاہر کی ہے کہ کامیابیوں کا یہ سلسلہ جاری رہے گا۔

بدھ کو وزیر اعظم آفس کے پریس ونگ سے جاری کردہ بیان کے مطابق وزیراعظم نے شاندار کھیل پیش کرنے پر پاکستانی کرکٹ ٹیم کی کارکردگی کی تعریف کی۔

وزیراعظم نے چیئرمین پاکستان کرکٹ بورڈ سید محسن رضا نقوی اور ٹیم مینجمنٹ کو خراج تحسین پیش کیا ۔وزیراعظم نے کہا کہ محمد رضوان اور سلمان آغا نے شاندار بیٹنگ کا مظاہرہ کیا،کرکٹ ٹیم نے ایک بار پھر سے قوم کے دل جیت لئے،انہوں نے کہا کہ چیمپئینز ٹرافی سے قبل اس اہم جیت سے ٹیم کا مورال بلند ہو گا،امید ہے کہ کامیابیوں کا یہ سلسلہ جاری رہے گا۔

Short Link: https://urdu.app.com.pk/urdu/?p=559978