تاشقند۔26فروری (اے پی پی):وزیراعظم محمد شہباز شریف اور ازبکستان کے صدر شوکت مرزایوف نے دونوں ممالک کے درمیان تجارت، سیاحت، توانائی، علاقائی رابطے و ثقافتی تعلقات کے فروغ اور دوطرفہ تجارتی حجم کو 2 ارب ڈالر پر پہنچانے پر اتفاق کرتے ہوئے ازبکستان-افغانستان-پاکستان ریلوے منصوبے پر عمل درآمد کے عزم کا اعادہ کیاہے۔ بدھ کو وزیراعظم آفس کے میڈیا ونگ سے جاری بیان کے مطابق وزیراعظم محمد شہباز شریف اور ازبک صدر شوکت مرزایوف کے درمیان تاشقند میں دوطرفہ ملاقات ہوئی۔
ملاقات کے دوران دونوں ممالک کے مابین باہمی تعاون بالخصوص تجارت، سیاحت، توانائی، علاقائی روابط اور ثقافتی تعلقات کے مزید فروغ پر گفتگو ہوئی۔ ملاقات میں دونوں رہنمائوں نے پاکستان اور ازبکستان کے مابین سفارتی تعلقات کے 33 برس کے دوران باہمی تعاون پر پیش رفت پر اطمینان کا اظہار کیا۔ دونوں رہنمائوں نے آئندہ چار برس میں پاکستان اور ازبکستان کے درمیان تجارت کے حجم کو 2 ارب ڈالر پر پہنچانے، ٹرانزٹ ٹریڈ ایگریمنٹ (2021)، ترجیحی تجارتی معاہدے (2023) پر موثر عملدرآمد، دونوں ممالک کے خصوصی اقتصادی زونز میں سرمایہ کاری اور پاکستان و ازبکستان کی کاروباری برادری کے مابین تعاون کے فروغ پر اتفاق کیا۔
دونوں رہنمائوں نے خطے میں تجارت و علاقائی روابط کے فروغ کیلئے ازبکستان-افغانستان-پاکستان ریلوے منصوبے کی کلیدی اہمیت پر اتفاق کیا اور دونوں ممالک کے اس منصوبے پر عمل درآمد کے عزم کا اعادہ کیا۔ ملاقات میں پاکستان اور ازبکستان کے مابین سیاحت کے فروغ بالخصوص ترمیز، بخارا، لاہور اور کراچی کے مابین اس حوالے سے تعاون پر گفتگو ہوئی۔ عالمی و علاقائی امور پر اپنے مشترکہ خیالات کا اظہار کرتے ہوئے دونوں رہنمائوں نے بین الاقوامی مسائل کے حل کیلئے عالمی تنظیموں بالخصوص اقوام متحدہ کے کردار کو پائیدار ترقی اور عالمی سطح پر امن و سلامتی کے حصول کیلئے فروغ دینے کی اہمیت پر زور دیا۔
وزیراعظم محمد شہباز شریف نے ملاقات میں پاکستان اور ازبکستان کے درمیان تاریخی اور ثقافتی رشتوں کو مزید مستحکم کرنے پر زور دیا۔ انہوں نے کہا کہ دونوں ممالک کے درمیان تجارتی اور معاشی تعاون کو بڑھانے کے لیے نئے راستے کھولنے کی ضرورت ہے۔ وزیر اعظم نے پاکستان کی جانب سے علاقائی روابط کے شعبے میں مشترکہ منصوبوں پر توجہ مرکوز کرنے کے عزم کا اعادہ کیا۔ وزیراعظم شہباز شریف نے پاکستان اور ازبکستان کے درمیان مضبوط شراکت داری کو دونوں ممالک اور پورے خطے کی ترقی اور خوشحالی کے لیے فائدہ مند قرار دیا۔ازبکستان کے صدر شوکت مرزا یوف نے پاکستان کے ساتھ تعلقات کو مزید مضبوط بنانے کی خواہش کا اظہار کیا۔
ازبک صدر نے کہا کہ خطے میں استحکام اور ترقی کے لیے دونوں ممالک کا باہمی تعاون کلیدی اہمیت کا حامل ہے۔ صدر مرزا یوف نے پاکستان میں حکومت کی معاشی استحکام اور ملکی ترقی کے اقدامات کی تعریف کرتے ہوئے کہا کہ ازبکستان پاکستان کے ساتھ تجارتی اور اقتصادی شراکت داری کو نئی بلندیوں تک لے جانے کے لیے پرعزم ہے۔ وزیراعظم شہباز شریف اور صدر مرزا یوف کی ملاقات کے بعد دونوں ممالک کے وفود کے درمیان اعلیٰ سطحی ملاقات ہوئی۔
ملاقات میں نائب وزیر اعظم و وزیر خارجہ محمد اسحاق ڈار، وزیر تجارت جام کمال خان، وزیر سرمایہ کاری و نجکاری عبدالعلیم خان، وفاقی وزیر اطلاعات و نشریات عطاء اللہ تارڑ اور معاون خصوصی طارق فاطمی بھی شامل تھے۔ملاقات میں پاکستان اور ازبکستان کی جانب سے تجارت، سیاحت، توانائی، تعلیم، ثقافت، علاقائی روابط اور دفاعی شعبوں میں تعاون کو مزید مضبوط کرنے کے حوالے سے موجود استعداد پر تفصیلی تبادلہ خیال کیا گیا۔ دونوں ممالک کے وفود نے مشترکہ مفادات کے حصول کے لیے عملی اقدامات پر زور دیا۔
Short Link: https://urdu.app.com.pk/urdu/?p=566505
