اسلام آباد۔21اپریل (اے پی پی):وزیراعظم محمد شہباز شریف نے جنوبی وزیرستان میں انسداد پولیو مہم کی ٹیم کے تحفظ پر مامور پولیس اہلکاروں پر دہشتگردوں کے حملے کی شدید مذمت کرتےہوئے کہا ہے کہ انسداد پولیو مہم کے کارکنوں پر اور ان کے تحفظ پر مامور اہلکاروں پر حملہ کرنے والے دہشتگرد انسانیت اور قوم کے دشمن ہیں،پولیو کے خلاف مہم جاری رہے گی۔
پیر کو وزیراعظم آفس کے میڈیا ونگ سے جار ی بیان کے مطابق وزیراعظم نے واقعے میں کانسٹیبل کی شہادت پر افسوس کااظہار کرتےہوئے شہید کانسٹیبل کے لئے مغفرت اور لواحقین کےلئےصبر و استقامت کی دعا کی ۔ وزیراعظم نے زخمیوں کو فوری طبی امداد فراہم کرنے کی ہدایت کی۔ وزیراعظم نے کہاکہ انسداد پولیو مہم کے کارکنوں پر اور ان کے تحفظ پر مامور اہلکاروں پر حملہ کرنے والے دہشتگرد انسانیت اور قوم کے دشمن ہیں۔
معصوم شہریوں کی جان و مال کو نقصان پہنچانے والے انسانیت کے دشمن دہشتگردوں کو کیفر کردار تک پہنچائیں گے ۔ وزیراعظم نے عوام سے اپیل کی کہ ان عناصر کے دباؤ میں نہ آئیں۔ پولیو کے خلاف مہم جاری رکھی جائے گی۔ وزیراعظم نے کہا کہ حکومت پاکستان اور قانون نافذ کرنے والے ادارے ملک سے دہشتگردی کے عفریت کو جڑ سے ختم کرنے کے لئے دن رات محنت کر رہے ہیں۔
Short Link: https://urdu.app.com.pk/urdu/?p=585077
