وزیراعلیٰ پنجاب مریم نواز کی زیرِ صدارت مسلم لیگ (ن)کی پارلیمانی پارٹی کا اجلاس، بیوٹی فکیشن پلان و دیگر پراجیکٹ بارے بریفنگ

لاہور۔21مئی (اے پی پی):وزیراعلیٰ پنجاب مریم نواز شریف کی زیرِ صدارت پاکستان مسلم لیگ (ن)کی پارلیمانی پارٹی کا اجلاس منعقد ہوا۔اجلاس میں آپریشن بنیان مرصوص کے شہدا کیلئے فاتحہ خوانی کی گئی۔ وزیراعلیٰ مریم نواز نے ارکان اسمبلی کو پہلے جامع اور منفرد بیوٹی فکیشن پلان اور ہر پراجیکٹ کے بارے میں خود تین گھٹنے طویل بریفنگ دی۔اجلاس میں گفتگو کرتے ہوئے وزیراعلیٰ مریم نوازشریف نے بتایا کہ بیوٹی فکیشن پلان کے تحت ہر ڈسٹرکٹ کے بازاروں میں لٹکتے بے ہنگم بجلی کی تاریں انڈر گراونڈ کی جائیں گی،ہر ڈسٹرکٹ اور تحصیل میں ریڑھی بازار قائم ہوگا اور مختلف شہروں میں کینالز کو بھی سجایا جائے گا۔ بیوٹی فکیشن پلان کے تحت بازاروں کی ری ماڈلنگ، انفراسٹرکچر میں بہتری لائی جائے گی اور فوڈ سٹریٹ بھی قائم کی جائیں گی۔ وزیراعلیٰ مریم نواز نے پارلیمانی پارٹی کے اجلاس میں ارکان اسمبلی سے انکی نشستوں پر جا کر ملاقات کی

اور ارکان اسمبلی سے حال احوال دریافت کیا۔ارکان اسمبلی نے آپریشن بنیان مرصوص کی کامیابی پر مبارکباد پیش کی اور قائد محمد نواز شریف، وزیر اعظم محمد شہباز شریف اور فیلڈ مارشل سید عاصم منیر کو زبردست خراج تحسین پیش کیا۔ارکان اسمبلی نے بیک وقت80 سے زائد بڑے ڈویلپمنٹ پراجیکٹ شروع کرنے پر وزیراعلیٰ مریم نوازکا شکریہ ادا کیا۔وزیراعلیٰ نے پاکستان مسلم لیگ(ن) کے پارلیمانی پارٹی کے اجلاس میں صوبہ بھر میں پنجاب ڈویلپمنٹ پلان لانے کا اعلان اور 60 شہروں میں پنجاب ڈویلپمنٹ پراجیکٹ اسی سال مکمل کرنے کا فیصلہ کیا ، اس کے علاوہ 800 گاؤں کو بتدریج ماڈل ویلج بنانے ،ارکان اسمبلی کی مشاورت سے دیہات میں400کلو میٹر چھوٹی رابط سڑکوں کی تعمیر و توسیع ،اگلے سال سے سڑکوں کی تعمیر و توسیع کیلئے ڈھائی سو ارب کے فنڈز دینے

اور 1100 الیکٹرک بسیں پنجاب کے تمام اضلاع کو دینے کا اعلان کیاجبکہ سال کے آخر تک ایک لاکھ گھروں کی تعمیر کا ہدف مکمل کرنے کے عزم کا اعادہ کیا گیا۔ وزیرِ اعلیٰ نے فیصل آباد اور گوجرانوالہ میں میٹرو بس سروس جلد شروع کرنے ،لاہور کینال روڈ پر اے آر ٹی ٹرانسپورٹ پراجیکٹ بھی جلد شروع کرنے ، پنجاب بھر میں نادار اور ضرورت مندوں کیلئے راشن کارڈ جلد لانچ کرنے ،ہر بڑے شہر میں واسا قائم کرنے ،ہرڈویژن میں سینٹر آف ایکسی لنس کنڈرگارٹن کیمپس بنانے کا اعلان بھی کیا۔وزیراعلیٰ مریم نواز نے پارلیمانی پارٹی کے اجلاس سے خطاب کرتے ہوئے کہا کہ جو وعدہ کروں گی پورا کروں گی،تجاوزات کے خاتمے سے صوبہ بھر میں بازار کھلے ہوگئے جس سے عوام خوش ہے۔انہوں نے کہا کہ پنجاب کے دور دراز علاقوں میں پانی کی فراہمی یقینی بنائیں گے،ستھرا پنجاب کو روز بروز بہتر سے بہترین بنانے کی کوشش کررہے ہیں

شہروں کے بعد پہلی مرتبہ گاوں کو بھی صفائی پروگرام میں شامل کیا گیا ہے۔وزیراعلیٰ نے کہا کہ کوئی ڈسٹرکٹ یا تحصیل بیوٹی فکیشن پلان سے محروم نہیں رہے گاارکان اسمبلی میرے بہن، بھائیوں کی طرح اور آنکھیں اور کان کے مترادف ہیں۔انہوں نے کہا کہ جرائم پیشہ افراد کے خلاف بے رحمانہ آپریشن کرینگے، شرپسند عناصر پنجاب میں بد امنی پھیلانے کی کوشش کرتے ہیں۔انہوں نے کہا کہ سی ٹی ڈی کو مضبوط بنایا،صوبہ بھر میں کومبنگ آپریشن ہو رہے ہیں،چند ماہ میں پنجاب کے سب شہر وں میں سیف سٹی پروجیکٹس ہوں گے،پنجاب میں موثر اینٹی نارکوٹکس فورس کو متحرک کردیا گیا،بے زبان جانوروں کے تحفظ کی بھی موثر مہم جاری ہے۔وزیراعلیٰ مریم نواز نے کہا کہ 8ہزار پر مشتمل پیرا فورس انسداد تجاوزات،پرائس کنٹرول اور دیگر امور کیلئے کام شروع کرنے کے لئے تیار ہے۔لاہور ڈویلپمنٹ پلان کے تحت6 ہزار گلیاں، سیور اور واٹر ٹینک وغیرہ بن رہے ہیں

عوام کا پیسہ اب عوام پر ہی خرچ ہو رہا ہے،ایک ایک پیسہ عوام کی امانت ہے،سوچ سمجھ کر خرچ کرنا ہے۔انہوں نے کہا کہ ہم نیک نیتی سے کام کر رہے ہیں، اللہ تعالی ضرور اجر دے گا،رمضان پیکج کی شفافیت کی ماضی میں مثال نہیں ملتی۔وزیراعلیٰ مریم نواز نے کہا کہ عوام کے ساتھ ساتھ کاشتکاروں کا مفاد بھی پیش نظر ہے،لاہور میں450 کلومیٹر تک سیور لائن ڈالی جا رہی ہے۔وزیرِ اعلیٰ نے کہا کہ عوام کی خدمت میں معاونت کرنے والی ٹیم کا بھی شکریہ ادا کرتی ہوں۔معاون خصوصی برائے سیاسی امور رانا ثنا اللہ نے وزیر اعلیٰ مریم نوازکے عام آدمی کی بھلائی کے اقدامات کو سراہا۔سپیکر پنجاب اسمبلی ملک محمد احمد خان نے وزیر اعلیٰ مریم نواز کا شکریہ ادا کیا۔ اجلاس میں رکن پنجاب اسمبلی ارشد وڑائچ مرحوم اور ایم پی اے فیصل کے والد مرحوم کے لئے بھی دعا مغفرت کی گئی۔

Short Link: https://urdu.app.com.pk/urdu/?p=599795