لاہور۔18اپریل (اے پی پی):پنجاب میں پہلی مرتبہ سرکاری سطح پر جدید ترین مصنوعی انسانی اعضا کی ٹیکنالوجی بایونکس کا آغازکردیاگیا، بایونکس ٹیکنالوجی سے بنے مصنوعی اعضامیں دماغ کے سگنل کے مطابق حرکت دینے کی صلاحیت ہوتی ہے جس کے ذریعے معذور افراد کی بحالی اوران کی زندگیوں کو عام افراد کی طرح فعال بنانے کی صلاحیت رکھنے والا پنجاب پاکستان کا پہلا صوبہ بن گیا۔
بایونکس دنیا کی مہنگی ترین ٹیکنالوجی ہے،وزیراعلی مریم نواز نے چھ سالہ سہیل کو بایونکس ٹیکنالوجی کے مصنوعی بازو لگوادیئے،وزیراعلی کرنٹ لگنے سے کہنی کے نیچے بازو سے محروم سہیل کو سٹیج پر خودلے کر آئیں، دماغ سے خود کارسگنل ملنے پر حرکت کرنے والے بازو کی تنصیب سے ننھے سہیل کی زندگی بدل گئی،کمسن سہیل نے حادثے کے بعد پہلی مرتبہ اپنے دونوں ہاتھوں کو حرکت دی اور وزیراعلی کے کہنے پر تالیاں بجا کر اظہار مسرت کیا۔
وزیراعلی مریم نواز نے ننھے سہیل سے ہاتھ ملا کر ہائی فائیو کیا، سہیل کی حوصلہ افزائی اور پیار کیا، کمسن سہیل کو اپنے ساتھ سٹیج سے واپس لائیں۔وزیراعلی مریم نواز نے سپیشل افراد کیلئے معاون آلات کے سب سے بڑے پراجیکٹ کا افتتاح کردیا، وزیراعلی نے خود کار وہیل چیئر، پیڈز وہیل چیئر،ٹرائی وہیل سکوٹی ودیگر معاون آلات دیئے اور حوصلہ افزائی کی۔ تقریب میں پنجاب بھر سے 300 سے زائد سپیشل افراد نے شرکت کی جبکہ تقریب میں آمد پر دو پیاری خاص بچیوں عائزہ اور عائشہ نے وزیراعلی مریم نواز کا خیر مقدم کیا اور گلدستے پیش کئے۔
وزیراعلی تقریب میں سپیشل افراد کے درمیان بیٹھ گئیں،ننھی بچے کو ساتھ بٹھا لیا اور پیار کیا،قوت گویائی سے محروم بچوں نے تقریب میں قومی ترانے، ترجمہ تلاوت کو اشاروں کی زبان میں بیان کیا۔صوبائی وزیر سہیل شوکت بٹ نے تقریب سے خطاب میں پراجیکٹ کی تفصیلات سے آگاہ کیا۔
صوبہ بھر میں سپیشل افراد کو ایک ارب کے مصنوعی اعضا،آلہ سماعت، وہیل چیئر اور دیگر آلات مفت دیئے جائیں گے۔سپیشل افراد کو مینوئل وہیل چیئر، رولیٹر، ٹرائی سائیکل، الیکٹرک اور موٹررائزڈ وہیل چیئر دیئے جائیں گے،ٹرائی موٹر سائیکل، واکنگ واکر، فریم موبائل ٹائلٹ چیئر، پیڈز وہیل چیئر، کنٹرولڈ وہیل چیئر بھی دی جائے گی۔سپیشل افراد کو ضرورت کے مطابق آلہ سماعت اور مصنوعی اعضا بھی مفت دیئے جائیں گے۔
Short Link: https://urdu.app.com.pk/urdu/?p=584326
