اسلام آباد۔10فروری (اے پی پی):وفاقی وزیرداخلہ محسن نقوی نے سی ڈی اے اور ڈی ایچ اے کے نئے مشترکہ سیکٹر مارگلہ انکلیو کا دورہ کیا،سائٹ پر جا کر جاری ترقیاتی کاموں کا جائزہ لیا۔ مارگلہ انکلیو کا 50 فیصد ترقیاتی کام 14 اگست جبکہ 100 فیصد ترقیاتی کام 31 دسمبر تک مکمل کرکے مالکان کو پلاٹس کا قبضہ دینے کا فیصلہ کیا گیا۔
وزیرداخلہ محسن نقوی نے ہدایت کی کہ ترقیاتی کاموں کی رفتار کو تیز کیا جائے اور ڈویلپمنٹ ورک جلد مکمل کرنے کے لئے تمام وسائل بروئے کار لائے جائیں۔ انہوں نے مارگلہ انکلیو تک آسان رسائی کے لئے نیا راستہ تعمیر کرنے کی بھی ہدایت کی اور کہ وزیر اعظم ہاؤس سے مارگلہ انکلیو تک متبادل راستے کا فاصلہ صرف 5 منٹ تک ہونا چاہیے۔ وزیر داخلہ نے مارگلہ انکلیو کے راستے میں تجاوزات کوفوری طور پر ہٹانے کا حکم دیا۔
انہوں نے واضح کیا کہ بہترین لوکیشن کی وجہ سے شہریوں نے اس منصوبے میں گہری دلچسپی ظاہر کی ہے، اس منصوبے میں خوبصورت لوکیشن کے ساتھ ساتھ شہریوں کو تمام معیاری اور جدیدسہولیات فراہم کی جائیں گی، مارگلہ انکلیو میں جھیل بھی بنے گی۔
ڈی ایچ اے کے پراجیکٹ ڈائریکٹر نے بریفنگ دیتے ہوئے بتایا کہ مارگلہ انکلیو 10 ہزار کنال اراضی پر بن رہا ہے جس میں 5 مرلہ، 10 مرلہ اور ایک کنال کے پلاٹس رکھے گئے ہیں، درخواستیں جمع کرانے کی آخری تاریخ 14 فروری ہے۔ چیئرمین سی ڈی اے محمد علی رندھاوا اور ڈی ایچ اے کے پراجیکٹ ڈائریکٹر نے ڈویلپمنٹ ورک اور سیکٹرز پلاننگ کے بارے میں بریفنگ دی۔
Short Link: https://urdu.app.com.pk/urdu/?p=558608
