لاہور۔6جنوری (اے پی پی):پنجاب میں اراضی کی منتقلی کے لئے ای رجسٹریشن کا ماڈل نظام متعارف کر ادیا گیا، وزیر اعلی محسن نقوی نے ایل ڈی اے پلازہ کشمیر روڈ پر پنجاب کے پہلے ای رجسٹریشن ماڈل سنٹر کا افتتاح کیا۔ ای رجسٹریشن ماڈل سنٹر میں شہریوں کی سہولت کے لئے راوی ٹاؤن،سمن آباد ٹاؤن اور داتا گنج بخش ٹاؤن کے سب رجسٹرارز کے دفاتر منتقل کئے گئے۔انہوں نے رائیونڈ اور شالیمار میں دو مزید ای رجسٹریشن سنٹرز 31جنوری تک مکمل کرنے کا حکم دیدیا۔
وزیر اعلی محسن نقوی نے ای رجسٹریشن ماڈل سنٹر کا تفصیلی دورہ کیا اور اراضی منتقلی کے ای نظام کا معائنہ کیا۔انہوں نے شہریوں کی سہولت کیلئے فیس کی آن لائن ادائیگی کا نظام وضع کرنے کی ہدایت کی۔ وزیر اعلی نے ای رجسٹریشن سنٹر میں بینک آف پنجاب کی برانچ کا بھی دورہ کیا اور سنٹر میں قائم راوی ٹاؤن،سمن آباد ٹاؤن اور داتا گنج بخش ٹاؤن کے سب رجسٹرارز کے دفاتر کا معائنہ کیا۔ محسن نقوی نے اراضی منتقلی کیلئے آئے شہریوں سے گفتگو کی اور ای رجسٹریشن نظام کے بارے میں دریافت کیا۔
وزیر اعلی نے ای رجسٹریشن ماڈل سنٹر میں موجود گڑھی شاہو کے رہائشی سے سوال کیا کہ آپ سے رجسٹری کے پیسے تو نہیں لئے گئے،شہری نے ای رجسٹریشن سسٹم کو سراہتے ہوئے جواب دیا کہ پیسے نہیں لئے گئے اور رجسٹری کا سسٹم بھی اب آسان ہے۔ وزیر اعلی محسن نقوی نے کہا کہ تینوں ٹاؤن کی اراضی کی منتقلی کا عمل ایک ہی چھت تلے ای رجسٹریشن سنٹر پر ہوگا،عوام کو اراضی منتقلی کیلئے دفاتر کے چکر لگانے سے سے نجات ملے گی۔ ای رجسٹریشن سنٹر کے قیام سے اراضی منتقلی کے عمل سے شفافیت آئے گی، کرپشن کا خاتمہ ہوگا۔پنجاب کے ہر ڈویژنل ہیڈ کوارٹر میں ای رجسٹریشن سنٹرزبنائے جائیں گے،لاہور میں پہلے ای رجسٹریشن کا افتتاح کر دیا ہے، باقی دو سنٹرز بھی جلد مکمل کریں گے،
میں چند روز میں رائیونڈ اور شالیمار جاکر سنٹرزپر کام کا جائزہ لوں گا، ای رجسٹریشن ماڈل سنٹر پر کم سے کم وقت میں ای رجسٹری کے تمام مراحل مکمل ہونگے۔انہوں نے ای رجسٹریشن نظام کے اجرا پر سینئرممبر بورڈ آف ریونیو،پنجاب لینڈ ریکارڈ اتھارٹی، انتظامیہ اور ان کی ٹیم کی کارکردگی کو سراہا۔ سینئر ممبر بورڈ آف ریونیو اور ڈی جی پنجاب لینڈ ریکارڈ اتھارٹی نے ای رجسٹریشن نظام کے تحت اراضی کی منتقلی کے عمل کے بارے میں تفصیلی بریفنگ دی
وزیر اعلی محسن نقوی نے لاہور میں پہلے ای رجسٹریشن سنٹر کے افتتاح کے بعد میڈیا سے گفتگو کرتے ہوئے کہا کہ اب مینول طریقے سے رجسٹری نہیں ہوگی، اب تک 2لاکھ 21ہزار رجسٹریاں ہوچکی ہیں، لاہور میں مینول رجسٹری پر پابندی لگا دی گئی ہے، صرف ای رجسٹری ہوگی۔ ای رجسٹریشن سنٹر میں شہریوں کے لئے بہترین سہولتیں فراہم کی گئی ہیں۔ انہوں نے کہا کہ لاہور میں ایک ای رجسٹریشن سنٹرکا افتتاح کر دیا ہے جبکہ دومزید ای رجسٹریشن سنٹر شالیمار ٹاؤن اور رائیونڈ میں بنائے جائیں گے۔
ڈپٹی کمشنر کو ہدایت کی ہے کہ 31جنوری تک دونوں ای رجسٹریشن سنٹر ز کو مکمل کریں۔ ای رجسٹریشن سنٹر میں بینک آف پنجاب کی سہولت مہیا کی گئی، جلد نادراکی بھی سہولت فراہم کر دیں گے۔ وزیر اعلی محسن نقوی نے کہا کہ ای رجسٹریشن سنٹر بننے سے ٹیکس چوری ختم ہوگی۔ کچھ عرصہ قبل داتا گنج بخش ٹاؤن رجسٹری آفس کا دورہ کیا تھا، دفتر کی حالت انتہائی خستہ حال تھی، بیٹھنے کی کوئی جگہ نہیں تھی، تب فیصلہ کیا کہ رجسٹریشن آفس کی حالت بہتر کریں گے۔سب نے محنت کی ہے، سینئر ممبر بورڈ آف ریونیو کو کریڈٹ جاتا ہے جنہوں نے دن رات محنت کی ہے۔
ای رجسٹریشن سنٹر پر لوگوں کو آرام دہ سہولتیں مہیا ہونگی اور فراڈ سے بھی بچیں گے۔انہوں نے کہا کہ زیر التوا درخواستیں ڈیش بورڈ پر وضع ہونگی۔ ای رجسٹریشن سنٹر بننے سے رجسٹری کا عمل تاخیر کا شکار نہیں ہوگا اور موقع پر ہی رجسٹری ہوگی۔ ایک سوال کے جواب میں محسن نقوی نے کہا کہ مجھے پروٹوکول سے فرق پڑتا ہے نہ تنقید سے،اگر تنقید پر دھیان دیتا تو میں کوئی کام نہ کر سکتا۔
وزیر اعلی نے کہا کہ ای رجسٹریشن سنٹر بننے سے رشوت سے متعلق شکایات کا خاتمہ ہوگا۔ ہر چیز کمپیوٹر ائزڈ ہے، وقت کا ضیاع نہیں ہوگا۔ ایک اور سوال کے جواب میں وزیر اعلی نے کہا کہ فی الحال سکولوں میں چھٹیاں بڑھانے کا کوئی فیصلہ نہیں ہوا۔ صوبائی وزیر ہاؤسنگ اظفر علی ناصر، چیئرمین پلاننگ اینڈ ڈویلپمنٹ بورڈ، سینئرممبر بورڈ آف ریونیو،کمشنر لاہورو ڈی جی ایل ڈی اے،، ڈپٹی کمشنر لاہور،ڈی جی پنجاب لینڈ ریکارڈ اتھارٹی اور متعلقہ حکام بھی اس موقع پر موجود تھے۔
Short Link: https://urdu.app.com.pk/urdu/?p=427307
