لاہور۔23فروری (اے پی پی):صوبائی وزیر اطلاعات پنجاب عظمی بخاری نے کہا ہے کہ وزیر اعلی مریم نواز نے پاکستان میں سیاست کے پیمانے کو یکسر تبدیل کر دیا ہے، پنجاب حکومت کا عوامی خدمات کے ریکارڈ قائم کرنے کا پہلا سال مکمل ہوا،جادو ٹونے سے حکومت چلانے والوں کا وقت گزر چکا ہے۔
اتوار کے روز جاری اپنے ایک بیان میں انہوں نے کہا کہ پنجاب حکومت کا عوامی خدمات کے ریکارڈ قائم کرنے کا پہلا سال مکمل ہوا ہے،مسلم لیگ(ن) وعدوں کی تکمیل کا نام ہے، وزیر اعلی مریم نواز نے ایک سال میں وہ تاریخ ساز کام کئے جو پہلے کوئی حکومت نہیں کر سکی۔انہوں نے کہا کہ وزیر اعلی نے پاکستان میں سیاست کے پیمانے کو یکسر تبدیل کر دیا ہے ،پنجاب حکومت عوام کی توقعات پر پورا اتری ہے، خیالی پلا ئو پکانے والے اور جادو ٹونے سے حکومت چلانے والوں کا وقت گزر چکا ہے، اب محمد نوازشریف کا عوامی خدمت کا دور ہے۔
عظمی بخاری نے کہا کہ پنجاب کے عوام نے مریم نواز کو جو مینڈیٹ دیا اس کے بدلے میں وہ پنجاب کو ترقی یافتہ بنا رہی ہیں۔انہوں نے گڈ گورننس، میرٹ اور شفافیت کو اپنا موٹو بنایا ہے، پی ٹی آ ئی کی فتنے، فساد اور انتشار کی سیاست کو دفن کردیا اب صرف پنجاب میں کام ہوگا، باقی صوبوں کے ترجمان ہمت کریں اور اپنے وزرا اعلی کی کارکردگی قوم کے سامنے پیش کریں۔
Short Link: https://urdu.app.com.pk/urdu/?p=565029
