لاہور۔23اپریل (اے پی پی):وزیر اعلی پنجاب مریم نواز کی زیر صدارت صوبائی کابینہ کے 25 ویں اجلاس میں کاشتکاروں کے لئے اہم فیصلوں کی منظوری دی گئی۔ اجلاس میں صوبائی وزیر صہیب بھرتھ کے چچا اور رکن پنجاب اسمبلی ارشد وڑائچ کے انتقال پر اظہار افسوس اور فاتحہ خوانی بھی کی گئی۔ صوبائی کابینہ نے وزیراعلی کو ترکیہ کے کامیاب دورے پر مبارکباد پیش کی۔ کابینہ نے وزیراعلی مریم نواز کے گرلز ایجوکیشن کے ویژن کو قابل تحسین قرار دیا۔
اجلاس میں فلور ملوں کے لئے 25فیصد گندم خریداری یقینی بنانے کے لئے فوڈگرینز (لائسنسنگ کنٹرول) آرڈریننس، 1957 میں ترمیم کی منظوری دی گئی جس کے تحت 25فیصد لازمی گندم خریداری نہ کرنے والے فلور ملوں کے لائسنس منسوخ ہو سکیں گے۔ اجلاس میں گندم کے کاشتکاروں کے حقوق کے تحفظ کے لئے ویٹ سیکٹر کی ڈی ریگولیشن اور (EWR) الیکٹرانک ویئر ہائوس ریسیٹ سسٹم کے نفاذ کی تجویز کی منظوری دی گئی جس سے کاشتکار وں کواپنی گندم سٹور کرنے کی سہولت ملے گی جبکہ سٹوریج کے اخراجات حکومت برادشت کرے گی۔ کابینہ اجلاس میں 15لاکھ کارکنوں، مزدوروں اور ورکرز کے لئے پاکستان کا سب سے بڑا راشن کارڈ متعارف کرانے کا اصولی فیصلہ کیا گیا، ورکرز کو راشن کارڈ کے ذریعے10ہزار روپے ماہانہ امداد کی تجویز پر اتفاق کیا گیا، وزیراعلی کی کاوشوں سے پنجاب میں چاول کے کاشتکاروں کے لئے بھی اہم فیصلے کیے گئے۔
کابینہ نے رائس ریسرچ انسٹیٹیوٹ، انہوئی اکیڈمی آف ایگریکلچرل سائنسز، چین اور ایوب ایگریکلچرل ریسرچ انسٹیٹیوٹ فیصل آباد کے درمیان ایم او یو (MoU) کی منظوری دی۔ چین کا ادارہ پنجاب میں چاول کاہائیبرڈ سیڈ متعارف کرانے کے لئے معاونت کرے گا۔ وزیراعلی نے کہا کہ زرعی تحقیق کا فائدہ براہ راست کاشتکار کو پہنچنا چاہیے،وزیراعلی مریم نوازنے واٹر سپلائی سکیموں کے واجبات کی فوری ادائیگی کا حکم بھی دیا۔ اجلاس میں چلڈرن لائبریری کمپلیکس لاہور کے قواعد و ضوابط میں ترمیم کی منظوری دی گئی، چلڈرن لائبریری کمپلیکس میں پاکستان کا پہلا نوازشریف ارلی ایجوکیشن سنٹر آف ایکسی لینس قائم کیا جائے گا، علاوہ ازیں کابینہ نے پنجاب کے مختلف شہروں میں ماحول دوست الیکٹرک بسیں چلانے کی منظوری دی۔
وزیراعلی نے راجن پور میں بھی الیکٹرک بس سروس شروع کرنے کا حکم دیا اور واسا وپارکس اینڈ ہارٹیکلچراتھارٹی کی کیپسٹی بلڈنگ کرنے کی ہدایت کی۔ اجلاس میں وزیر اعلی مریم نواز کے ویژن T-30 کے تحت فیصل آباد میں ماس ٹرانزٹ سسٹم کیلئے فزیبلیٹی اسٹڈی کی منظوری دی گئی، وزیر اعلی کے ویژن T-30 کے تحت لاہور میں ییلو، بلیو اور پرپل لائن کے ماس ٹرانزٹ سسٹمز کی فزیبلیٹی اسٹڈیز کی منظوری دی گئی،اسی طرح وزیر اعلی مریم نواز کے ویژن T-30 کے تحت گوجرانوالہ میں بھی ماس ٹرانزٹ سسٹم کی فزیبلیٹی اسٹڈی کی منظوری دی گئی۔ کابینہ نے پنجاب میں چنگ چی رکشوں کو ریگولیٹ کرنے کے لئے پنجاب موٹر وہیکل رولز 1969 میں ترامیم اور ادویات و ڈرگ کی خریداری کی مد میں واجبات کی ادائیگی کے لئے اضافی فنڈز کی فراہمی کی منظوری بھی دی، پنجاب کے ٹرشری کیئر ہسپتالوں کے لیے فرنیچر و آلات کی خریداری کے لئے فنڈز کی فراہمی کی منظوری دی گئی۔
وزیراعلی مریم نوازنے ہسپتالوں میں فرنیچر اور طبی آلات کی خریداری کے لیے مطلوبہ فنڈز فراہم کرنے کا حکم دیا۔ کابینہ پنجاب کنزیومر پروٹیکشن ایکٹ 2005 میں مجوزہ ترامیم کی منظوری دی جس کے تحت ایڈیشنل سیشن ججز کو صارفین عدالت کے اختیارات دیئے جائیں گے۔ پنجاب لیبر کوڈ 2024 کے مسودہ کی منظوری،کنسٹرکشن،ایگریکلچر اور دیگر شعبے کے ورکرزبھی شامل ہوسکیں گے۔ اجلاس میں پنجاب ایگریکلچر ریسرچ بورڈ (PARB) میں بھرتیوں پر پابندی میں نرمی اور پنجاب پبلک پرائیویٹ پارٹنرشپ اتھارٹی (P4A) میں بھرتیوں کی منظوری دی گئی۔ چیف ڈرگز کنٹرولر کے دفتر،صوبائی کوالٹی کنٹرول بورڈ لاہور کے ملازمین کے کنٹریکٹ میں توسیع کی منظوری، کابینہ نے میٹر ٹیسٹنگ لیب اور اضافی الیکٹرک انسپکٹر دفاتر کے قیام کے لئے منظور شدہ 97 آسامیوں کا سٹیٹس تبدیل کرنے اور 07 گاڑیوں کی خریداری کی منظوری دی۔
اساتذہ کی تقرری کے قواعد و ضوابط میں B.Edپیشہ ورانہ قابلیت کے حصول کے حوالے سے نرمی کی منظوری دی گئی۔ پنجاب کم از کم اجرت ایکٹ 2019 کے تحت انسپکٹرز کی تقرری کے نوٹیفیکیشن کی منظوری دی گئی۔ معدنیات کے شعبے کے لئے ریگولیٹری فریم ورک میں ہم آہنگی مائنز اینڈ منرلز ایکٹ 2025 کی منظوری دی گئی۔ اجلاس میں سوشل سکیورٹی اسکیم کے دائرہ کار کو وسیع کرنے کے لئے پنجاب ایمپلائیز سوشل سکیورٹی آرڈیننس 1965 میں مجوزہ ترامیم کی منظوری دی گئی۔ انتہاپسندی کے تدارک کے لئے سینٹر آف ایکسی لینس کے قیام سے متعلق مجوزہ بل کی منظوری دی گئی۔
اسی طرح شہدا، زخمی اور دیگر مستحق فوجی اہلکاروں کے خاندانوں کے لئے 30ہزار ایکڑ زرعی اراضی کی فراہمی کی منظوری دی گئی۔ اجلاس میں انسداد دہشت گردی ایکٹ 1997 میں بطور انسداد دہشت گردی (ترمیمی) ایکٹ 2025 مجوزہ ترامیم اور بلوچستان میں دہشت گرد حملے میں شہید افراد کے لواحقین کے لئے ایکس گریشیا امداد کی منظوری دی۔ اسی طرح پراونشل ورکرز سوشل سکیورٹی آرڈیننس 1965 میں مجوزہ ترمیم اور پنجاب ورکرز ویلفیئر فنڈ ایکٹ 2019 و کمپنیز پرافٹس (ورکرز پارٹیسپیشن) ترمیمی ایکٹ 2021 میں ترامیم کی منظوری دی گئی۔ انوائرنمنٹ پالیسی سینٹر (EPC)اور انوائرنمنٹ ٹیکنالوجی سینٹر (Etc) کو ضم کر کے نئے منسلک ادارے کلائمیٹ پالیسی اینڈ ٹیکنالوجی سینٹر (CPTC)کے قیام کی منظوری دی گئی۔
اجلاس میں پنجاب سپیشلائزڈ میڈیکل انسٹیٹیوشنز ایکٹ 2024، پنجاب جوڈیشل اکیڈمی ایکٹ 2007 میں ترامیم اور ای-ٹرانسفر پالیسی 2024 کی منظوری دی گئی، وزیراعلی نے ویڈ لاک پالیسی پر سختی سے عملدرآمد کی ہدایت کی۔ کابینہ نے کوہِ سلیمان ڈویلپمنٹ اتھارٹی کو کوہِ سلیمان علاقے میں جیپ ایبل ٹریکس کی تعمیر کے لئے ضمنی گرانٹ کی فراہمی کی منظوری دی۔ کھلاڑیوں کے قیام کے لئے نشتر پارک سپورٹس کمپلیکس لاہور میں ہوٹل /ہوسٹل کی تعمیرکی منظوری دی گئی۔ ضلع اٹک میں دریائے سندھ کے ساتھ موجود قیمتی دھاتوں (پلیسر گولڈ) کی بولی کیلئے ریزرو پرائس اور انوائرمنٹ پالیسی سنٹر و انوائرمنٹ ٹیکنالوجی سنٹر کو کلائمیٹ پالیسی اینڈ ٹیکنالوجی سنٹر میں بدلنے کی منظوری دی گئی۔
پولیس سٹیشنز کی کمپیوٹرائزیشن (CPS) منصوبے کی سکیم کو اے ڈی پی 2024-25 میں شامل کرنے کی منظوری دی گئی۔ وزیر اعلی کے ضلعی ایس ڈی جیز پروگرام کے تحت نئی ترقیاتی اسکیموں کی شمولیت اور پہلے سے منظور شدہ 03 ترقیاتی اسکیموں کی تبدیلی کی درخواست کی منظوری دی گئی۔اجلاس میں لاہور کی سات ترقیاتی سکیموں کو اے ڈی پی 2024-25 میں شامل کرنے اور مالی سال 2024-2025 کے لئے پانچ ارب روپے کے فنڈز کی فراہمی کی درخواست کی منظوری دی گئی۔ گورنمنٹ ٹیکنیکل ٹریننگ انسٹیٹیوٹ قصور کے لئے 187 کنال 8 مرلے اراضی کے حصول اور پنجاب ماڈل بازار مینجمنٹ کمپنی کے لئے فنڈز پنجاب سوشل پروٹیکشن اتھارٹی (PSPA)میں تبدیل کرنے کے لئے کی منظوری دی گئی۔
اسی طرح ایل ڈی اے ٹریبونل کے صدر کی تعیناتی اور فیصل آباد میں انسدادِ بدعنوانی عدالت میں سپیشل جج کی تعیناتی کی منظوری دی گئی۔ نواز شریف انسٹیٹیوٹ آف کارڈیالوجی، سرگودھا کے چیف ایگزیکٹو آفیسر / ڈین کی تقرری کی منظوری دی گئی۔ لینڈ اینڈ پراسکیوشن افیئرز ڈیپارٹمنٹ کے ڈائریکٹوریٹ آف مانیٹرنگ اینڈ ایویلیوایشن کے لئے چار گاڑیوں کی خریداری کے لئے ضمنی گرانٹ کی منظوری دی گئی۔ اجلاس میں بوائلرز اینڈ پریشر ویسلز آرڈیننس 2002 میں مزید ترامیم کی منظوری دی گئی۔ سجاد حسین سندھر، ڈی اینڈ ایس جے (ریٹائرڈ)، چیئرمین پنجاب سروس ٹربیونل لاہور کے حوالے سے پنجاب سبسڈیری ٹریژری رولز میں شرائط و ضوابط کی ترامیم کی منظوری دی گئی۔ پنجاب پروٹیکٹڈ ایریاز اینڈ وائلڈ لائف مینجمنٹ بورڈ کی از سر نو تشکیل کی منظوری دی گئی۔
اجلاس میں واسا راولپنڈی کے لئے بیل آئوٹ پیکیج اور پنجاب ایمپلائیز سوشل سکیورٹی انسٹیٹیوشن (PESSI) کی گورننگ باڈی کی از سر نو تشکیل کی منظوری دی گئی۔ پنجاب پروبیشن اینڈ پیروول سروس رولز 2025 اورپنجاب پبلک سروس کمیشن کی آڈٹ رپورٹ برائے سال 2024 کی منظوری بھی دی گئی۔ اجلاس میں صوبائی کابینہ کے 23ویں اور 24ویں اجلاس کے منٹس کی توثیق،کابینہ کی قائمہ کمیٹی برائے قانون سازی و نجکاری کے 14ویں اور 15ویں اجلاسوں کے منٹس کی توثیق،
کابینہ کی قائمہ کمیٹی برائے امن و امان کے 20ویں، 21ویں، 22ویں، 23ویں، 24ویں، 25ویں اور 26ویں اجلاسوں کے منٹس کی توثیق، پنجاب کی ضلعی حکومتوں کے اکائونٹس کی آڈٹ رپورٹس برائے سال 2019-20 اور 2020-21،حکومت پنجاب کے اکائونٹس کی آڈٹ رپورٹس برائے سال 2020-21 اور 2022-23 اور حکومت پنجاب کے اکائونٹس کی آڈٹ رپورٹس برائے سال 2018-19 اور 2019-2020 کی منظوری بھی دی گئی۔
Short Link: https://urdu.app.com.pk/urdu/?p=586561
