نیویارک۔20ستمبر (اے پی پی):وزیر خارجہ بلاول بھٹو زرداری نے افغانستان اور اس سے باہر دیرپا امن و استحکام کے لئے عبوری افغان حکومت کے ساتھ بین الاقوامی رابطے جاری رکھنے کی اہمیت پر زور دیتے ہوئے کہا ہے کہ ایک پرامن، مستحکم اور خوشحال افغانستان پاکستان کی ترجیح ہے۔منگل کو وزارت خارجہ کی جانب سے جاری بیان کے مطابق وزیر خارجہ بلاول بھٹو زرداری سے اقوام متحدہ کی جنرل اسمبلی کے 77ویں اجلاس کے موقع پر افغانستان کیلئے امریکہ کے خصوصی نمائندے تھامس ویسٹ نے ملاقات کی۔
ملاقات کے دوران وزیرخارجہ نے توسیعی ٹرائیکا میکانزم سمیت افغانستان میں آگے بڑھنے کےلئے علاقائی اتفاق رائے پیدا کرنے میں پاکستان کی سہولیات فراہم کرنے کوششوں کو اجاگر کیا۔ انہوں نے افغانستان کے ساتھ دوطرفہ مذاکرات کی حمایت کے ساتھ ساتھ بین الاقوامی انسانی امداد کی وسیع سہولت کے لئے پاکستان کی جانب سے اٹھائے گئے مختلف اقدامات پر بھی روشنی ڈالی۔ افغانستان میں انسانی ہمدردی کے امکانات کا حوالہ دیتے ہوئے ،جن کے بارے میں اقوام متحدہ اور بین الاقوامی ایجنسیوں نے خبردار کیا ہے کہ آنے والے موسم سرما میں مزید خراب ہو جائیں گے، وزیر خارجہ نے زور دیا کہ اس طرح کی صورتحال کے نتیجہ میں بڑے پیمانے پر پناہ گزینوں کی نقل مکانی ہو سکتی ہے اور دہشت گردوں/ انتہاپسندوں کو مضبوط ہونے کا موقع مل سکتا ہے اور اس کے علاقائی و بین الاقوامی اثرات ہوں گے۔
افغانستان کے لئے امریکی نمائندہ خصوصی تھامس ویسٹ نے افغانستان میں امن و استحکام اور انخلاء میں سہولت پر پاکستان کی کوششوں کو سراہا۔ دونوں فریقوں نے افغان عوام کے مصائب کے خاتمے اور علاقائی امن و استحکام کو فروغ دینے کے لئے مسلسل کوششوں اور بین الاقوامی برادری کی شمولیت کے مشترکہ مقاصد کے لئے مسلسل تعاون کی ضرورت کا اعتراف کیا۔
Short Link: https://urdu.app.com.pk/urdu/?p=328223
