اسلام آباد۔1مئی (اے پی پی):وزیر مملکت برائے خارجہ امور حنا ربانی کھر قطر کے دارالحکومت دوحہ میں اقوام متحدہ کے زیراہتمام افغانستان بارے منعقد ہونے والے خصوصی ایلچیوں کے دوروزہ اجلاس میں شرکت کر رہی ہیں، وہ اجلاس میں شرکت کے علاوہ دیگر ممالک کے رہنماؤں سے دو طرفہ ملاقاتیں بھی کریں گی۔دفتر خارجہ سے جاری بیان کے مطابق اقوام متحدہ کے سیکرٹری جنرل انتونیو گوتریش کی سربراہی میں ہونے والے اس اجلاس میں علاقائی اور عالمی ممالک افغانستان کی موجودہ صورتحال کو تعمیری بات چیت کے تناظر میں زیربحث لائیں گے۔
وزیر مملکت برائے خارجہ امور افغانستان کے حوالے سے پاکستان کا نقطہ نظر پیش کریں گی اور بین الاقوامی اور علاقائی شراکت داروں کے ساتھ آگے بڑھنے کے راستے کے حوالے سے اتفاق رائے پیدا کرنے بارے کام کریں گی۔ترجمان نے کہا کہ پاکستان ایک پرامن، مستحکم، خودمختار، خوشحال اور منسلک افغانستان کے مشترکہ مقاصد کو آگے بڑھانے کے لیے تمام کوششوں کی حمایت جاری رکھے گا۔
Short Link: https://urdu.app.com.pk/urdu/?p=361581
