کوئٹہ۔ 07 مارچ (اے پی پی):وفاقی محتسب ریجنل افس کوئٹہ میں کوئٹہ کے رہائشی درخواست گزار غلام محمد نے درخواست دائر کی تھی کے ان کے بیٹوں کا شناختی کارڈ بنوانے کے لئے نادرا گیا تو نادرا کی جانب سے ان کے بیٹوں کے شناختی کارڈ بنوانے میں تاخیر کی جا رہی تھی۔
درخواست گزار کا مزید کہنا تھا کہ انہوں نے اس سلسلے میں نادرا افس سے رابطہ کیا اور مختلف کمیٹیوں میں بھی پیش ہوئے مگر ان کا مسئلہ حل نہیں ہوا۔بالاخر مجبور ہو کر انہوں نے انصاف کے حصول کی خاطر وفاقی محتسب کے ادارے میں درخواست دائر کی۔درخواست موصول ہوتے ہی ریجنل افس کوئٹہ کے عملے نے انکوائری کا آغاز کیا اور نادرا عملے کو طلب کر کے جواب مانگا۔نادرا کا عملہ جواز پیش کرنے میں ناکام رہا۔چنانچہ وفاقی محتسب نے احکامات جاری کیے کہ فوری طور پر درخواست گزار کے بیٹوں کا شناختی کارڈ بنوایا جائے۔
وفاقی محتسب کے احکامات موصول ہوتے ہی متعلقہ محکمے نے درخواست گزار کے بیٹوں کا شناختی کارڈ بنوا دیا۔درخواست گزار نے وفاقی محتسب کے اس احسن اقدام پے شکریہ ادا کیا۔
Short Link: https://urdu.app.com.pk/urdu/?p=570016
