اسلام آباد۔8جولائی (اے پی پی):وفاقی وزیرداخلہ محسن نقوی نے پروٹیکٹڈ صارفین کو ریلیف دینے کےلئے تمام ڈسکوز کا ڈیٹا طلب کرلیا۔پیر کو وفاقی وزیرداخلہ محسن نقوی کی زیر صدارت وزارت داخلہ میں اجلاس منعقد ہوا، محسن نقوی نے پروٹیکٹڈ صارفین کو نان پروٹیکٹڈ کیٹگری میں شامل کرنے پر شدید تشویش کا اظہارکرتے ہوئے ایف آئی اے کے تمام ڈائریکٹرزکو ڈسکوز کے ڈیٹا کو چیک کرکے رپورٹ پیش کرنے کی ہدایت کی۔
انہوں نے 3 روز میں ایف آئی اے ڈائریکٹرز کو تمام شواہد جمع کرنے کا ٹاسک دے دیا۔ وزیرداخلہ نے کہا کہ تمام شواہد کی جامع رپورٹ وزیراعظم کو پیش کی جائے گی، پروٹیکٹڈ صارفین سے زیادتی کا ازالہ کرنا ضروری ہے۔ محسن نقوی نے ایڈیشنل ڈی جی ایف آئی اے نارتھ کو پشاور، لاہور ،گوجرانوالہ اور فیصل آباد خود جاکر صورتحال کا جائزہ لینے اور ڈیٹا جمع کرنے کی ہدایت کی اور کہا کہ شواہد کا جائزہ لے کر ذمہ داران کا تعین کیا جائے۔
اجلاس میں اوور بلنگ کے ایشو کا جائزہ لیا گیا۔ ایف آئی اے حکام نے اوور بلنگ پر بریفنگ دی۔ وفاقی سیکرٹری داخلہ، ایڈیشنل ڈی جی ایف آئی اے ہیڈکوارٹر ، ایڈیشنل سیکرٹری داخلہ، ایڈیشنل ڈی جی ایف آئی نارتھ اور متعلقہ حکام نے اجلاس میں شرکت کی۔ایف آئی اے کے تمام ڈائریکٹرز ویڈیو لنک کے ذریعے اجلاس میں شریک ہوئے۔
Short Link: https://urdu.app.com.pk/urdu/?p=482782
