اسلام آباد/جدہ۔8فروری (اے پی پی):وفاقی وزیر برائے تجارت جام کمال خان نے سعودی عرب کے بڑے اور اہم کاروباری اداروں کے حکام سے ملاقات کی اور دونوں ممالک کے درمیان کاروباری تعاون، سرمایہ کاری کے مواقع اور سعودی برانڈز کی پاکستان میں کاروبار کی توسیع پر تبادلہ خیال کیا ۔
وزارت تجارت کی جانب سے جاری علامیہ کے مطابق جدہ میں ہونے والی پہلی ’’میڈ اِن پاکستان‘‘ نمائش کے موقع پر ہونے والی ملاقاتوں میں وفاقی وزیر تجارت نے سعودی عرب کے بڑے اور اہم کاروباری اداروں کو پاکستان کے مختلف شعبوں بشمول توانائی، زراعت، آئی ٹی، صحت، انفراسٹرکچر اور صارفین کی مصنوعات میں سرمایہ کاری کی دعوت دی۔انہوں نے بتایا کہ پاکستان کی سعودی عرب کو برآمدات میں 22 فیصد اضافہ ہوا ہے جو 700 ملین ڈالر تک پہنچ چکی ہیں۔
انہوں نے سعودی سرمایہ کاروں کو یقین دلایا کہ پاکستان میں کاروبار کے لیے سازگار ماحول، ٹیکس میں چھوٹ، سرمایہ کاروں کے تحفظ کے قوانین اور 24 کروڑ سے زائد صارفین کی بڑی مارکیٹ تک رسائی موجود ہے۔
سعودی کاروباری شخصیات نے پاکستان کے ساتھ کاروباری شراکت داری میں گہری دلچسپی کا اظہار کیا اور خاص طور پر تعمیراتی سامان، ٹیکسٹائل اور خوراک کے شعبوں میں سرمایہ کاری کے علاوہ مختلف تجارتی معاہدوں اور صنعتی سرمایہ کاری کے منصوبوں پر بھی تبادلہ خیال کیا گیا۔
وفاقی وزیر نے سعودی سرمایہ کاروں کو پاکستان کا دورہ کرنے اور معروف تجارتی نمائشوں فوڈ-اے جی ، ٹیکسپواور ہیلتھ کیئر و منرل شو میں شرکت کی دعوت دی۔جام کمال خان نے پاکستان میں کاروبار کو آسان بنانے کے اقدامات پاکستان سنگل ونڈو (پی ایس ڈبلیو) اور نیشنل کمپلائنس سینٹر کا بھی خصوصی ذکر کیا اور بتایا کہ یہ اقدامات تجارتی قوانین کو مزید سہل بنانے اور برآمدات کے معیار کو بہتر کرنے کے لیے متعارف کرائے گئے ہیں۔
دورے کا ایک نمایاں پہلو وفاقی وزیر کی البیک کے مالک رامی ابو غزالہ سے ملاقات تھی۔ وفاقی وزیر جام کمال خان کو البیک کے آپریشنز کا خصوصی دورہ کروایا گیا جہاں انہوں نے پاکستانی ملازمین سے بھی ملاقات کی۔ملاقات میں البیک کی پاکستان میں توسیع پر گفتگو ہوئی جس کے دوران کمپنی نے تصدیق کی کہ وہ جلد پاکستان میں اپنی شاخیں کھولنے جا رہی ہے۔ البیک کے مالک نے بتایا کہ یہ معاہدہ حتمی مراحل میں داخل ہو چکا ہے اور جلد ہی پاکستانی صارفین کو معیاری فاسٹ فوڈ فراہم کیا جائے گا۔وفاقی وزیر نے البیک میں کام کرنے والے پاکستانی ورکرز کی خدمات کو سراہا اور برانڈ کے پاکستان میں آغاز کا خیر مقدم کیا۔ انہوں نے امید ظاہر کی کہ اس سے نہ صرف روزگار کے مواقع پیدا ہوں گے بلکہ پاکستان کے فاسٹ فوڈ سیکٹر میں مثبت تبدیلی بھی آئے گی۔
وفاقی وزیر برائے تجارت جام کمال خان نے جدہ میں مقیم پاکستانی سرمایہ کاروں اور کاروباری شخصیات سے بھی ملاقات کی اور سعودی عرب کی معیشت میں ان کے دہائیوں پر محیط کردار کو سراہا۔ انہوں نے بتایا کہ گزشتہ پانچ سالوں میں 17 لاکھ پاکستانیوں نے سعودی عرب کا سفر کیا ہے جو پاکستانی تارکین وطن کے لیے سب سے پسندیدہ ملک بن چکا ہے۔
انہوں نے یہ بھی ذکر کیا کہ گزشتہ مالی سال کے دوران سعودی عرب سے پاکستان کو 7.4 بلین ڈالر کی ترسیلات زر موصول ہوئیں جو دونوں ممالک کے درمیان مضبوط مالی تعلقات کی عکاسی کرتی ہیں۔ انہوں نے جدہ میں قائم پاکستان انویسٹر فورم کے کردار کو بھی اجاگر کیا جو پاکستانی سرمایہ کاروں کی رہنمائی اور سعودی کاروباری برادری سے روابط کو فروغ دینے میں اہم کردار ادا کر رہا ہے۔
وفاقی وزیر نے پاکستان کی نئی ویزا پالیسی کا ذکر بھی کیا جس کے تحت جی سی سی ممالک کے شہریوں کے لیے ویزا فری انٹری کی سہولت دی گئی ہے جس کے باعث کاروباری مقاصد مزید آسان ہو گئے ہیں ۔وزیر تجارت جام کمال خان کے جدہ میں اعلیٰ سطحی تجارتی مذاکرات پاکستان اور سعودی عرب کے درمیان اقتصادی تعاون کے ایک نئے دور کا آغاز ثابت ہو رہے ہیں۔ سعودی تاجروں کا پاکستان میں سرمایہ کاری میں بڑھتا ہوا رجحان، تجارتی حجم میں اضافہ اور نئی کاروباری شراکت داریاں اس تعلق کو مزید وسعت دینے کا اشارہ دے رہی ہیں۔البیک جیسے بڑے سعودی برانڈز کی پاکستان آمد اور سعودی سرمایہ کاروں کی بڑھتی ہوئی دلچسپی سے پاکستانی معیشت میں نمایاں بہتری اور تجارتی مواقع کی نئی راہیں کھلنے کی توقع ہے۔
Short Link: https://urdu.app.com.pk/urdu/?p=557393
