اسلام آباد ۔ 27 مارچ (اے پی پی) حکومت پاکستان اور آئی ایم ایف کے درمیان آج منگل کو دبئی میں شروع ہونے والے مزاکرات کے تناظر میں اقتصادی اشاریوں اور معاشی اصلاحات پر پیشرفت کا جائزہ لینے کے لئے اجلاس وفاقی وزیر خزانہ سینیٹر اسحاق ڈار کی زیر صدارت ہوا۔ وزیر خزانہ مزاکرات کے آخری مرحلے میں پاکستانی وفد کی قیادت کریں گے۔ اس موقع پر سیکرٹری خزانہ نے مزاکرات کے حوالے سے تیاریوں کے بارے میں اجلاس کو بریفنگ دی اور اصلاحاتی عمل کی مضبوطی کے لئے کئے گئے اقدامات کے بارے میں آگاہ کیا۔ وزیر خزانہ نے امید ظاہر کی کہ فریقین کے درمیان مزاکرات کا دور تعمیری ہوگا۔ انہوں نے زور دیا کہ اقتصادی اصلاحات کے شعبے میں پاکستان کی کامیابیوں کو بھر پور طریقے سے مزاکرات میں اجاگر کیا جائے ۔اجلاس میں وزارت خزانہ، وزارت پانی و بجلی، وزارت پٹرولیم و قدرتی وسائل، ایوی ایشن ڈویژن، ایف بی آر اور نجکاری کمیشن کے حکام نے بھی شرکت کی۔
Short Link: https://urdu.app.com.pk/urdu/?p=48082
