اسلام آباد۔4مارچ (اے پی پی):وفاقی وزیر برائے صنعت و پیداوار رانا تنویر حسین سے تاجکستان کے سفیر نے منگل کو ملاقات کی ۔ملاقات میں پاکستان اور تاجکستان کے درمیان تجارتی و اقتصادی تعلقات اور ایف ٹی اے معاہدے پر تبادلہ خیال کیا گیا ۔
وفاقی وزیر برائے صنعت و پیداوار رانا تنویر حسین اور تاجک سفیر کے درمیان گفتگو میں گوادر اور کراچی بندرگاہوں کے استعمال، لاجسٹک مسائل کے حل، پاکستانی مصنوعات میں تاجکستان کی دلچسپی، اور براہ راست پروازوں کی ضرورت جیسے موضوعات پر تبادلہ خیال ہوا۔
دونوں ممالک کے درمیان ایف ٹی اے (فری ٹریڈ ایگریمنٹ) اور تاجکستان کو چینی برآمد کرنے کے امکانات بھی زیر بحث آئے۔ ملاقات میں دونوں برادر ممالک کے درمیان تجارتی روابط کو مزید فروغ دینے پر زور دیا ۔رانا تنویر حسین نے کہا کہ پاکستان اور تاجکستان کے تعلقات گہرے ہیں، تجارتی روابط مزید بڑھائیں گے،برادر ملک تاجکستان کے مسائل کے حل کے لیے ہر ممکن کوشش کریں گے، تاجکستان کی پاکستانی مصنوعات میں دلچسپی خوش آئند ہے۔
اس موقع پرتاجکستان کی پاکستان کو تجارتی نمائش کی تجویز بھی زیر غورآئی۔اس دوران تاجکستان کو چینی برآمد کرنے پر رانا تنویر حسین اور تاجک سفیر کے درمیان اہم بات چیت کی گئی۔ تاجک سفیر نے پاکستان اور تاجکستان کے درمیان براہ راست پروازوں کی ضرورت پر زور دیا ۔
Short Link: https://urdu.app.com.pk/urdu/?p=568569
