لاہور۔11اپریل (اے پی پی):وزیراعلی مریم نوازشریف کے ویژن کے تحت ٹرانس جینڈرز بھیک نہیں بلکہ باعزت روزگارکمائیں گے،پنجاب کی تاریخ میں پہلی مرتبہ ٹرانس جینڈرکمیونٹی کے لئے باعزت اور باوقار زندگی گزارنے کے راستے کھل گئے۔ترجمان ایوان وزیر اعلی کے مطابق پنجاب میں پہلی مرتبہ ٹرانس جینڈرز کے لئے ٹیکنیکل سکلز کی ٹریننگ کا جامع پروگرام شروع کیا گیا، جس میں1600 ٹرانس جینڈرز کے لئے پہلے مرحلے میں خصوصی طورپر پنجاب سکلز ڈویلپمنٹ فنڈپروگرام کے تحت مختلف فنون سکھائے جائیں گے،ٹرانس جینڈرز کو آئی ٹی، فری لانسنگ کی ٹریننگ کے ذریعے معاشی طور پر خود مختار بنایا جائے گا۔
ترجمان نے بتایا کہ پنجاب میں پہلی مرتبہ ٹرانس جینڈرز کے لئے ہیلتھ کیئر اسسٹنٹ سکل ٹریننگ کا اہتمام کیا جائے گا،باعزت روزگار کمانے کے لئے ٹرانس جینڈرز کو ٹیلرنگ اور فیشن ڈیزائنگ بھی سکھائی جائے گی،ٹرانس جینڈر کمیونٹی کو جن پروگرامز میں تربیت فراہم کی جائے گی ان میں الیکٹریکل ورک،سولر ٹیکنالوجی، بیوٹی سروسز اور کلنری آرٹس شامل ہیں۔
وزیر اعلی مریم نواز شریف نے کہا کہ ٹرانس جینڈر کے ساتھ بے رحمانہ رویہ افسوسناک ہے،ٹرانس جینڈرزمناسب روزگار نہ ملنے کی وجہ سے بھیک مانگنے پر مجبور ہیں،ٹرانس جینڈرز کو ہنر سکھا کر ثابت کریں گے کہ ٹیلنٹ کا کوئی جینڈر نہیں۔مریم نوازشریف نے کہا کہ ٹرانس جینڈرز کی ٹریننگ ہی نہیں بلکہ معاشرے میں باوقار مقام دینے کی جدوجہد کررہے ہیں، انقلابی ووکیشنل ٹریننگ پروگرام سے ٹرانس جینڈر کی زندگیاں بدل رہی ہیں۔
Short Link: https://urdu.app.com.pk/urdu/?p=580648
