اسلام آباد۔17مارچ (اے پی پی):وفاقی وزیر ریلوے محمد حنیف عباسی نے کہا ہے کہ جعفر ایکسپریس حملے کے بعد ٹریک کی بحالی مکمل ، کل(منگل ) سے پاکستان ریلوے کا آپریشن شروع کر دیا جائے گا ، بلوچستان میں ٹرین کی ڈرون کے ذریعے نگرانی کی جائے گی ، ملک بھر کے ریلوے سٹیشنز اور حساس مقامات پر سی سی ٹی وی کیمرے نصب کرنے کا فیصلہ کیا گیا ہے ، غیر ملکی امداد پر پھلنے والی پی ٹی آئی بھارتی پروپیگنڈے کو سوشل میڈیا کے ذریعے آگے بڑھاتے ہوئے نظر آئی ، ریلوے ملازمین کی پنشن میں کچھ مشکلات ہیں وہ جلد دور کر لیں گے ۔
وہ پیر کو پارلیمنٹ ہائونس کے بعد میڈیا سے گفتگو کر رہے تھے ۔ وفاقی وزیر ریلوے محمد حنیف عباسی نے کہا کہ جعفر ایکسپریس کا اندوہناک واقعہ پیش آیا اس واقعہ سے متعلق قوم کو آگاہ کرتے رہے ہیں ۔ اس واقعہ میں پاکستان ریلوے اور ریلوے پولیس کے 2 ملازمین شہید ہوئے ہیں جن کے پاکستان ریلوے کی جانب سے فی کس دو ،دو لاکھ روپے مالی امداد فراہم کی جائے گی ۔
انہوں نے کہا کہ جعفر ایکسپریس حملے کے بعد پاکستان سکیورٹی فورسز جس پیشہ وارانہ مہارت سے آپریشن کر کے یرغمالیوں کو بچایا اس کی دنیا میں مثال نہیں ملتی، ایک ہی مقام پر 9 خودکش حملہ آوروں کی موجودگی میں ایک جانی نقصان بھی ہوئے بغیر تمام مسافروں کو بازیاب کرایا گیا ۔ایک سوال کے جواب میں انہوں نے کہا کہ اس واقعہ میں ٹریک کو شدید نقصان پہنچا ،جیسے ہی سکیورٹی فورسز نے کلیئرنس دی اس کے ساتھ ہی پاکستان ریلوے کے مزدورں نے ٹریک بحالی کے لئے دن رات کا م کیا ، اب ٹریک بحال ہو گیا ہے
جس کے بعد کل سے باقاعدہ کوئٹہ ٹرین سروس کا بھی دوبارہ آغاز ہوجائے گا ۔ انہوں نے کہا کہ انہوں نے کہا کہ اس واقعہ میں جتنے بھی مسافر شہید ہوئے وہ سکیورٹی فورسز کے وہاں پہنچنے سے پہلے دہشت گردوں کی فائرنگ سے شہید ہوچکے تھے ۔ سکیورٹی فورسز کے آپریشن کے دوران ایک شہری کی شہادت بھی نہیں ہوئی بلکہ حملہ آور 33 افراد کو جہنم واصل کیا گیا ۔ انہوں نے کہا کہ ہمارا دشمن چاہتا ہے کہ ملک عدم استحکام کا شکار ہو وہ اس کے لئے کوششیں بھی کرتا رہتا ہے ۔
وزیر ریلوے محمد حنیف عباسی نے کہا کہ پوری قوم نے دیکھ لیا کہ آستین کے سانپ ہمارے ملک کے اندر ہی موجود ہیں ۔ ہندوستانی میڈیا کو کیسے معلوم تھا کہ ٹرین حادثہ ہونا ہے اور اس پر اس اندازسے مصنوعی ذہانت کا استعمال کرتے ہوئے پروپیگنڈاکرنا ہے اور اسکے ساتھ ہی ملک کے اندر غیر ملکی امداد پر پھلنے والی تحریک انصاف کی سوشل میڈیا مشنیں اس پروپیگنڈے کو اسی رفتار سے آگے بڑھاتی نظر آتی ہے ۔
انہوں نے ملک کی تمام سیاسی قوتوں سے اپیل کی کہ ملکی مفادات کی خاطر دہشت گردی کے خلاف یکجا ہو جائیں ، پوری قوم پاک فو ج کے پیچھے کھڑی ہے ۔ انہوں نے کہا کہ عوام کی حمایت سے ہماری سکیورٹی فورسز دہشت گردی کے خلاف جنگ میں کامیابی سے ہمکنار ہونگی ۔
Short Link: https://urdu.app.com.pk/urdu/?p=573582
