اسلام آباد۔11جولائی (اے پی پی):پاکستان نے ایک بار پھر اس بات کا اعادہ کیا ہے کہ وہ اقوام متحدہ کی سلامتی کونسل کی قراردادوں کے مطابق تنازعہ جموں و کشمیر کے منصفانہ اور پرامن حل کے لیے کشمیریوں کی سیاسی، سفارتی اور اخلاقی حمایت جاری رکھے گا۔ ترجمان دفتر خارجہ ممتاز زہرہ بلوچ نے جمعرات یہاں پریس بریفنگ میں کہا کہ 93 واں ”یوم شہدائے کشمیر“ 13 جولائی کو منایا جائے گا، یہ دن ان 22 کشمیریوں کی شہادت کی یاد مناتا ہے جنہوں نے 1931 میں سرینگر میں ڈوگرہ فورسز کی اندھا دھند فائرنگ کا مقابلہ کرتے ہوئے اپنی جانیں قربان کیں۔ ترجمان نے کہا کہ ہم ان کی بہادری کو سلام پیش کرتے ہیں جنہوں نے کشمیری عوام کے حقوق و آزادی اور ان کے حق خود ارادیت کے لیے ایک دلیرانہ تحریک کو جنم دیا، یہ تحریک آج تک جاری ہے۔
ترجمان نے کہا کہ ڈوگرہ افواج کی طرز پر بھارتی افواج نے گزشتہ چند دہائیوں میں ہزاروں کشمیریوں کو محض اپنے حقوق کے مطالبے پر قتل کیا ہے، معروف کشمیری نوجوان رہنما برہان مظفر وانی ان سینکڑوں کشمیری نوجوانوں میں سے ایک تھے جو بھارت کے غیر قانونی طور پر زیر تسلط جموں و کشمیر میں ماورائے عدالت قتل کا شکار ہوچکے ہیں، ان کی آٹھویں برسی 8 جولائی کو منائی گئی۔ انہوں نے کہا کہ ”یوم شہدائے کشمیر“کے اس ہفتے میں ہم ایک بار پھر بھارتی حکومت سے مطالبہ کرتے ہیں کہ وہ کشمیری عوام کے خلاف ماورائے عدالت قتل اور مہلک طاقت کے اندھا دھند استعمال کی مہم کو بند کرے۔
Short Link: https://urdu.app.com.pk/urdu/?p=483834
