اسلام آباد ۔ 23 نومبر (اے پی پی) پاکستان اور ترکی کے درمیان سپر مشاق طیاروں کی فروخت کا معاہدہ طے پا گیا۔ معاہدے کی تقریب ایکسپو سنٹر کراچی میں جاری آئیڈیاز 2016کے دوران ہوئی۔ ائیر مارشل ارشد ملک، چیئرمین پاکستان ائیروناٹیکل کمپلیکس اورترک دفاعی پیدوار کی وزارت کے ڈپٹی سیکریٹری مصطفٰی سیکر نے اس تاریخی معاہدے پر دستخط کئے۔ معاہدے کے تحت پاکستان ائیرو ناٹیکل کمپلیکس ترکی کو 52 سپر مشاق طیارے مہیا کرے گا جو ترک فضائیہ کے پائلٹس کی ابتدائی تربیت میں استعمال ہونگے اس کے علاوہ پاکستان ائیرو ناٹیکل کمپلیکس ان طیاروں کے انجن کی مرمت اور اوورہال کی سہولت بھی فراہم کرے گا۔ وزیر اعظم محمد نواز شریف، وزیر دفاع خواجہ محمد آصف ، وفاقی وزیر برائے دفاعی پیداوار رانا تنویر حسین ، پاک فضائیہ کے سربراہ ائیر چیف مارشل سہیل امان کے علاوہ پاکستان اور ترکی کے اعلیٰ عہدیداران بھی اس موقع پر موجود تھے۔
