پاکستان اور چین کے تعلقات باہمی اعتماد، احترام اور بھائی چارے پر مبنی ہیں، سردار ایاز صادق

اسلام آباد۔21مئی (اے پی پی):سپیکر قومی اسمبلی سردار ایاز صادق نے پاک-چین دوستی کے 74 سال مکمل ہونے پر دونوں ممالک کے درمیان لازوال تعلقات کو خراجِ تحسین پیش کرتے ہوئے کہا ہے کہ پاکستان اور چین کے تعلقات باہمی اعتماد، احترام اور بھائی چارے پر مبنی ہیں، دونوں ممالک کی دوستی وقت کی ہر آزمائش پر پوری اتری ہے اور ہر گزرتے دن کے ساتھ یہ رشتہ مزید مستحکم ہو رہا ہے۔

بدھ کو یہاں منعقدہ خصوصی تقریب سے خطاب کرتے ہوئے انہوں نے اس لازوال دوستی کوپہاڑوں سے بلند، سمندر سے گہری اور شہد سے میٹھی قرار دیا۔ سپیکر قومی اسمبلی نے کہا کہ پاک چین شراکت داری استحکام، ترقی اور علاقائی سلامتی کا مظہر بن چکی ہے، پاکستان کو چین کی معیشت، دفاع اور سائنس و ٹیکنالوجی میں ترقی پر فخر ہے، دفاعی شعبے میں چین کے ساتھ اشتراک پاکستان کی تزویراتی طاقت کی بنیاد ہے، جے ایف-17 تھنڈر، J-10C اور PL-15 میزائل پاکستان کی مضبوط دفاعی صلاحیتوں کا عکاس ہیں۔ سپیکر قومی اسمبلی نے سی پیک منصوبے کو پاکستان-

چین دوستی کی زندہ مثال قرار دیتے ہوئے کہا کہ ون بیلٹ ون روڈ منصوبہ پورے خطے کی ترقی کا ضامن ہے۔ سردار ایاز صادق نے زور دیا کہ دونوں ممالک باہمی ترقی اور خوشحالی کے سفر میں قابلِ اعتماد شراکت دار ہیں اور یہ تعلق آئندہ بھی وقت کی تمام آزمائشوں میں قائم و دائم رہے گا۔ اس موقع پر سپیکر قومی اسمبلی سردار ایاز صادق نے خضدار، بلوچستان میں آرمی پبلک سکول کے بچوں کی بس پر ہونے والے دہشتگرد حملے کی شدید مذمت کی۔ انہوں نے حملے میں 4 بچوں سمیت 6 قیمتی جانوں کے ضیاع پر گہرے دکھ اور افسوس کا اظہار کیا اور متاثرہ خاندانوں سے دلی ہمدردی اور یکجہتی کا اظہار کیا۔

انہوں نے کہا کہ پاکستان اپنے معصوم بچوں کا خون رائیگاں نہیں جانے دے گا۔ انہوں نے اس بزدلانہ حملے کو انسانیت کے خلاف جرم قرار دیتے ہوئے دہشتگردوں کے خلاف بھرپور کارروائی کا عزم ظاہر کیا۔ سپیکر سردار ایاز صادق نے بھارت کی حالیہ جارحیت کا منہ توڑ جواب دینے پر پاکستان کی مسلح افواج کو خراجِ تحسین پیش کیا۔ انہوں نے کہا کہ افواجِ پاکستان نے ملک کی فضائی، زمینی اور سمندری حدود کا بہادری اور کامیابی سے دفاع کیا ہے، جو پوری قوم کے لیے باعثِ فخر ہے۔

Short Link: https://urdu.app.com.pk/urdu/?p=599917