اسلام آباد۔25اپریل (اے پی پی):پاکستان سمیت دنیا بھر میں عالمی یوم رقص29 اپریل کو منایا جائے گا۔رقص آرٹ اور کلچر کے قدیم ترین اظہار میں سے ایک ہے اور یہ جذبات اور مزاج کے اظہار کا ایک بہترین ذریعہ سمجھا جاتا ہے۔ رقص کی مختلف اشکال تمام ثقافتوں میں موجود ہیں اور اکثر یہ دعویٰ کیا جاتا ہے کہ رقص قدیم ترین انسانی معاشروں کا حصہ رہاہے۔
تاریخ دانوں کے مطابق تہذیبوں کی ابتدا سے ہی رقص تقریبات اور رسومات کا ایک اہم حصہ رہا ہے تاہم اسے دنیا کے بعض حصوں میں منفی نظروں سے دیکھا جاتا ہے اور حکام کی طرف سے اسے کم ترجیح دی جاتی ہے۔رقص کی آرٹ کے طور پراہمیت کے بارے بیداری پیدا کرنے کے لئے دنیا بھر میں ہر سال 29 اپریل کو رقص کا عالمی دن منایا جاتاہے۔
یہ دن منانے کی روایت 1982ء سے ہے جب دنیابھر کے تمام ممالک میں رقص کی تمام اقسام کی تنظیم انٹرنیشنل ڈانس کونسل نے اسے یونیسکو کے تحت منانے کی بنیاد رکھی تھی۔ رقص کے عالمی دن کی مناسبت سے ملک کے مختلف شہروں میں تقریبات کا انعقاد کیا جائے گا۔
Short Link: https://urdu.app.com.pk/urdu/?p=460098
