اسلام آباد۔30نومبر (اے پی پی):پاکستان سول ایویشن اتھارٹی کے زیر اہتمام اسلام آباد انٹرنیشنل ایئرپورٹ پر فل سکیل ایئرپورٹ ایمرجنسی ایکسرسائز کا کامیاب انعقاد کیا گیا ۔ پاکستان سول ایوی ایشن اتھارٹی کے ترجمان کی طرف سے جمعرات کو جاری بیان کے مطابق مشق کا مقصد پاکستان سول ایوی ایشن اتھارٹی کے داخلی محکموں، ایئر لائنز اور بیرونی ہنگامی سروسز کی تیاریوں کا جائزہ لینا اور ان کو مضبوط بنانا تھا۔ مشق میں ایندھن کی آگ بجھا کر ہوائی جہاز کے حادثے کی منظر کشی کی گئی۔ ہوائی جہاز سے مسافروں کو نکالنے اور بچاؤ کی کارروائیاں الگ سے کی گئیں۔ اس مشق کے لئے پی ائی اے نے بوئنگ Boing-777 فراہم کیا تھا۔
مشق میں اے ایس ایف، ایئر لائنز آپریٹنگ کمیٹی، گراؤنڈ ہینڈلنگ ایجنسیز شریک ہوئیں، مختلف ہسپتالوں، ہنگامی خدمات اور سرکاری محکموں نے بھی مشق میں شرکت کی۔ پاکستان آرمی ایوی ایشن نے ہیلی کاپٹر اور ہنر مند میڈیکل ٹیم فراہم کرکے مشق میں شرکت کی۔
ہوا بازی کے غیر جانبدار امپائرز اور دیگر طبی ماہرین نے مشق کو دیکھا اور یونٹس کی کارکردگی کو سراہا۔ چیف آپریٹنگ آفیسر /ایئرپورٹ منیجر سید آفتاب علی شاہ گیلانی اور ایکسرسائز کوآرڈینیٹر فائر چیف ایم اسلم رضوی کی کمانڈ میں پاکستان سول ایوی ایشن اتھارٹی (پی سی اے اے) کی جانب سے کرائسز اینڈ ایمرجنسی رسپانس پلان کے تحت وسیع پیمانے پر ہنگامی مشق کا انعقاد کیا گیا۔
ترجمان سول ایوی ایشن کے مطابق یہ مشق ہر دو سال بعد انٹرنیشنل سول ایوی ایشن آرگنائزیشن کے معیارات اور سفارش کردہ طریقوں کے مطابق کی جاتی ہے۔ اس مشق کا مقصد سول ایوی ایشن اتھارٹی کے کرائسز اینڈ ایمرجنسی رسپانس پلان (سی ای آر پی) کی عملی تیاری کا جائزہ لینا ، خاص طور پر پی سی اے اے کے داخلی شعبوں اور بیرونی ہنگامی خدمات کے مربوط ردعمل کی کوششوں کا اندازہ لگانا اور اسے مضبوط بنانا بھی ہے۔ اس مشق سے کسی بھی پرواز کا شیڈول یا آپریشن متاثرنہیں ہوا۔
Short Link: https://urdu.app.com.pk/urdu/?p=415389
