راولپنڈی۔12اپریل (اے پی پی):پاکستان سپر لیگ کے موقع پر راولپنڈی پولیس کی جانب سے سکیورٹی کے سخت انتظامات کیے گئے ہیں۔ سی پی او سید خالد ہمدانی نے گزشتہ روز راولپنڈی کرکٹ سٹیڈیم کا دورہ کیا۔ انہوں نے پوائنٹ وائز ڈیوٹی پر مامور افسران کو چیک کیا اور ہدایات دیں۔
اس موقع پر ایس ایس پی آپریشنز، ایس پی راول، ایس پی صدر، ایس پی سکیورٹی سمیت ایس ڈی پی اوز اور دیگر افسران بھی ان کے ہمراہ تھے۔ سی پی او کا کہنا تھا کہ سٹیڈیم میں پاور بینک، ہینڈ فری، ائیر پوڈز، کھانے پینے کی اشیاء سمیت کوئی ممنوعہ شے ساتھ لے جانے کی اجازت نہیں ہے۔ پاک فوج، رینجرز، دیگر سکیورٹی اداروں اور ضلعی انتظامیہ کے ربط سے فول پروف سکیورٹی انتظامات کو یقینی بنایا جا رہا ہے۔
انہوں نے کہا کہ راولپنڈی پولیس پی ایس ایل میچز کے دوران شہریوں کو پر سہولت اور خوشگوار ماحول کی فراہمی یقینی بنانے کے لیے تمام وسائل بروئے کار لا رہی ہے۔ پی ایس ایل کے کامیاب انعقاد کے لیے اپنی ذمہ داری اور کردار کو بھرپور محنت کے ساتھ نبھائیں گے۔ ترجمان راولپنڈی پولیس کے مطابق راولپنڈی پولیس کے 6 ہزار پولیس افسران و جوان سکیورٹی و ٹریفک کے فرائض انجام دے رہے ہیں۔
تمام سینئر افسران فیلڈ میں موجود رہ کر ڈیوٹی پر مامور افسران کو چیک اور بریف کر رہے ہیں۔ سٹیڈیم کے گردونواح میں ایلیٹ فورس، ڈولفن فورس اور تھانوں کی موبائلز گشت کر رہی ہیں جبکہ شائقین کرکٹ کو واک تھرو گیٹ اور مکمل باڈی سرچنگ کے بعد اسٹیڈیم میں داخلے کی اجازت دی جا رہی ہے ۔
Short Link: https://urdu.app.com.pk/urdu/?p=581000
