پاکستان موسمیاتی و ماحولیاتی تبدیلی سے نمٹنے کے لیے پھرپور اقدامات کر رہا ہے، موسمیاتی و ماحولیاتی اقدامات اور پہلوئوں کو معاشی اور مالیاتی پالیسیوں سے ہم آہنگ کرناضروری ہے، وزیرخزانہ محمداورنگزیب

اسلام آباد۔23اپریل (اے پی پی):وفاقی وزیر خزانہ سینیٹر محمد اورنگزیب نے کہاہے کہ پاکستان موسمیاتی وماحولیاتی تبدیلی سے نمٹنے کیلئے پھرپوراقدامات کررہاہے،موسمیاتی و ماحولیاتی اقدامات اور پہلوئوں کو معاشی اور مالیاتی پالیسیوں کے ساتھ ہم آہنگ کرناضروری ہے۔انہوں نے یہ بات بدھ کوواشنگٹن ڈی سی میں عالمی بینک اوربین الاقوامی مالیاتی فنڈ کے موسم بہارکے سالانہ اجلاس کے موقع پر موسمیاتی اقدامات کے لیے قائم وزرائے خزانہ کے اتحاد کے 13ویں وزارتی اجلاس سے خطاب کرتے ہوئے کہی۔ اجلاس میں محدود مالی وسائل اور بدلتے سیاسی حالات کے تناظر میں موسمیاتی و ماحولیاتی تبدیلی سے نمٹنے اور اقتصادی ترقی کے حصول سے متعلق امور پر غوروخوض کیا گیا۔

وزیرخزانہ نے اپنے خطاب میں پاکستان کی جانب سے ماحولیاتی تبدیلی سے نمٹنے کی کوششوں پر روشنی ڈالتے ہوئے کہاکہ پاکستان موسمیاتی وماحولیاتی تبدیلی سے نمٹنے کیلئے پھرپوراقدامات کررہاہے۔ انہوں نے ماحولیاتی مسائل کے موثر حل کے لیے پاکستان میں تیار کردہ کلائمیٹ پراسپیرٹی پلان اور کلائمیٹ فنانس سٹریٹجی کے بارے میں شرکا کو آگاہ کیا۔ وزیرخزانہ نے پاکستان اورعالمی بینک کے درمیان طے پانے والے دس سالہ کنٹری پارٹنرشپ فریم ورک میں ماحولیاتی امورکو بطور ستون شامل کیے جانے کا تذکرہ کرتے ہوئے کہاکہ کنٹری پارٹنرشپ پروگرام کے تحت پاکستان میں ماحولیاتی وموسمیاتی لچک اور کاربن کے اخراج میں کمی جیسے پہلوئوں پر خاص زور دیا گیا ہے۔

انہوں نے پاکستان کی جانب سے ریزیلینس اینڈ سسٹین ایبیلٹی فسیلٹ کے تحت آئی ایم ایف کے ساتھ سٹاف سطح کے معاہدہ کا بھی ذکر کیا اورکہاکہ اس معاہدے کے تحت ماحولیاتی وموسمیاتی تبدیلیوں کے تناظر میں طویل مدتی مالیاتی استحکام کا حصول ممکن بنایا جائے گا۔وزیر خزانہ نے اپنے خطاب میں موسمیاتی و ماحولیاتی اقدامات اور پہلوئوں کو معاشی اور مالیاتی پالیسیوں سے ہم آہنگ کرنے کی ضرورت پرزوردیا اس حوالے سے سرکاری اور نجی دونوں شعبوں میں صلاحیت کو بہتر بنانے کو ایک چیلنج قرار دیتے ہوئے سرمایہ کاری اور مالی معاونت کے لیے موزوں اور ہم آہنگ منصوبہ جات کی اہمیت کو اجاگر کیا۔

ماحولیاتی وموسمیاتی اقدامات کے لیے قائم وزرائے خزانہ کے اتحاد میں 90 سے زائد ممالک اور 25 ادارہ جاتی شراکت دارشامل ہیں۔ا تحاد کا مقصد ماحولیاتی وموسمیاتی تبدیلیوں سے نمٹنے میں وزرائے خزانہ کے قائدانہ کردار کو مضبوط اور موثر بنانا اور مالیاتی و اقتصادی پالیسیوں کو ہم آہنگ کرتے ہوئے کاربن کے اخراج میں کمی اور مضبوط و پائیدار ترقی کی جانب منصفانہ منتقلی کو یقینی بنانا ہے۔

Short Link: https://urdu.app.com.pk/urdu/?p=586625