پاکستان میں ڈیڑھ سے پونے دو کروڑ افراد گردے کی بیماریوں میں مبتلا ہیں، احتیاطی تدابیر اپناکر ہم بہت ساری بیماریوں سے محفوظ رہ سکتے ہیں، ڈاکٹر جمال ناصر

اسلام آباد۔13مارچ (اے پی پی):سابق صوبائی وزیر صحت و بہبود آبادی پنجاب ڈاکٹر جمال ناصر نے کہا ہے کہ اس وقت ہمارے ملک میں ڈیڑھ سے پونے دو کروڑ افراد گردے کی بیماریوں میں مبتلا ہیں اور بدقسمتی سے پاکستان میں ابھی بھی اس شعبے کے حوالے سے کچھ زیادہ ترقی نہیں ہو سکی۔ان خیالات کا اظہار انہوں نے گردوں کے عالمی دن کے حوالے سے نفرالوجی ڈیپارٹمنٹ پاکستان انسٹیٹیوٹ آف میڈیکل سائنسز (پمز) اور سٹی لیب کے تعاون سے اسلام آباد میں ایک واک، سیمینار اور میڈیکل کیمپ کے دوران کیا ۔

عوام کی ایک بڑی تعداد بھی اس واک میں موجود تھی۔ انہوں نے کہا کہ احتیاطی تدابیر اپناکر ہم بہت ساری بیماریوں سے محفوظ رہ سکتے ہیں۔ انہوں نے کہا کہ اس وقت ہمارے پاکستان میں ڈیڑھ سے پونے دو کروڑ افراد گردے کی بیماریوں میں مبتلا ہیں اور بدقسمتی سے پاکستان میں ابھی بھی اس کی شعبے کے حوالے سے کچھ زیادہ ترقی نہیں ہو سکی۔ انہوں نے کہا کہ ہمیں چاہیئے کہ سال میں ایک دفعہ اپنا مکمل طبی معائنہ ضرور کروائیں۔

ترقی یافتہ ملکوں میں حکومت کی طرف سے گھروں میں جاکر ہر قسم کے طبی معائنوں کا اہتمام بھی کیا جاتا ہے آج ایسے ملکو ں میں اوسط عمر بھی زیادہ ہے اور شرح اموات بھی کم ہے۔ انہوں نے حکومتوں پر زور دیا کہ اتنی بڑی تعداد میں مریضوں کیلئے زیادہ سے زیادہ جدید ہسپتال بنا کر لوگوں کو جدید علاج کی سہولیات مہیا کی جائیں۔ ڈاکٹر ساجد عباسی نے کہا کہ گردوں کی بیماری ایک ایسی بیماری ہے کہ جس سے ہم احتیاطی تدابیر اختیار کر کے بچ سکتے ہیں اور ہمیں چاہیے کہ جیسے ہی تکلیف شروع ہو تو فورا ڈاکٹر سے رجوع کریں۔

واک کے مہمان خصوصی سابق صوبائی وزیر صحت و بہبود آبادی پنجاب ڈاکٹر جمال ناصر تھے جبکہ اس واک میں ہیڈ آف نفرالوجی ڈیپارٹمنٹ ڈاکٹر ساجد عباسی، ڈاکٹر وقارضیاء، ڈاکٹر شاہانہ، ڈاکٹر حسن، ڈاکٹر مریم، ڈاکٹر علی مراد اور دیگر ڈاکٹرز نے شرکت کی۔آخر میں شرکا میں شیلڈ زاور انعامات تقسیم کیے گئے۔

Short Link: https://urdu.app.com.pk/urdu/?p=572200