اقوام متحدہ۔17جنوری (اے پی پی):پاکستان نے یوکرین میں جاری جنگ جلد از جلد ختم کرنے کا مطالبہ کرتے ہوئے کہا ہے کہ اس جنگ میں شہریوں کا جانی و دیگر نقصان بہت زیادہ ہے۔
اقوام متحدہ میں پاکستان کے نائب مستقل مندوب عثمان جدون نے سلامتی کونسل میں یوکرین جنگ پر اظہار خیال کرتے ہوئے کہا کہ یہ اجلاس اس حوالے سے اہم موقعے پر ہو رہا ہے کہ یوکرین کی جنگ کو تین سال پورے ہونے والے ہیں اور عالمی ادارے کی انڈر سیکرٹری جنرل برائے سیاسی امور روزمیری ڈی کارلو کی سلامتی کونسل کو بریفنگ کے مطابق اس میں مسلسل شدت ا ٓرہی ہے جو تشویشناک ہے۔
انہوں نے کہا کہ اس جنگ میں شہریوں کا بڑے پیمانے پر جانی و دیگر نقصان ہورہاہے، اس کے علاوہ بنیادی ڈھانچے کو بھی شدید نقصان ہوا ۔
پاکستانی مندوب نے خبردار کیا کہ جنگ کی شدت میں اضافہ موجودہ بحران کو مزید بڑھا دےگا، ہمیں جنگ کے جلد خاتمے اور ایک ایسے حل کی ضرورت ہے جو پائیدار اور دیرپا امن قائم کر سکے۔ عثمان جدون نے کہا کہ یوکرین جنگ کے مسئلے کا حل میدان جنگ میں نہیں بلکہ بات چیت اور مذاکرات میں ہے ۔
انہوں نے کہا کہ بجائے اس کے کہ تنازعے کو مزید ہوا دی جائے ،پاکستان اس تنازعے کے خاتمے کے لئے مذاکرات اور سفارت کاری کو ترجیح دینے کی ضرورت پر زور دیتا ہے۔
قبل ازیں سلامتی کونسل کو بریفنگ میں اقوام متحدہ کی انڈر سیکرٹری جنرل برائے سیاسی امور روزمیری ڈی کارلو نے بتایا کہ سب سے پریشان کن بات یہ ہے کہ 2024 میں یوکرین جنگ میں شہریوں کی ہلاکتوں کی تعداد میں خطرناک حد تک اضافہ دیکھا گیا ۔
انہوں نے اقوام متحدہ کے انسانی حقوق کے دفتر کے اعداد و شمار کا حوالہ دیتے ہوئے کہا کہ گزشتہ سال ہلاک اور زخمی ہونے والے شہریوں کی کل تعداد 2023 کے مقابلے میں 30 فیصد زیادہ ہے۔
انہوں نے بتایا کہ صرف گزشتہ دو ہفتوں میں جنگ کے باعث بچوں سمیت 1,600 سے زیادہ افراد اپنا گھر بار چھوڑنے پر مجبور ہوئے ۔ ا ن کا کہنا تھا کہ اقوام متحدہ نے شہریوں اور شہری انفراسٹرکچر پر حملوں کی واضح طور پر مذمت کی اور انہیں بند کرنے کے مطالبے کا اعادہ کیا ہے۔
انہوں نے بتایا کہ یوکرین کے مشرق اور جنوب میں شدید لڑائی جاری ہے، روس کے علاقے کرسک میں جھڑپیں جاری ہیں اور اقوام متحدہ کو سرحد کے دونوں جانب جنگ سے نقصانات اور تباہی پر تشویش ہے۔انہوں نے مزید کہا کہ جنگ کے باعث متاثرہ افراد کے لئے امدادی سرگرمیوں میں بھی مشکلات کا سامنا ہے۔
ا ن کا کہنا تھا کہ اقوام متحدہ نے اس سال تقریباً 60 لاکھ افراد کی مدد کے لیے 2.6 بلین ڈالر کا منصوبہ شروع کیا ہے جس کے لئے بین الاقوامی برادری کی جانب سے مکمل حمایت کی ضرورت ہے۔
Short Link: https://urdu.app.com.pk/urdu/?p=547417
