پاکستان کشمیریوں کی اخلاقی، سیاسی اور سفارتی مدد جاری رکھے گا، عاطف اکرام شیخ

اسلام آباد۔26اکتوبر (اے پی پی):صدر فیڈریشن آف پاکستان چیمبر آف کامرس اینڈ انڈسٹری عاطف اکرام شیخ نے کشمیریوں کے 77 ویں یوم سیاہ پر اپنے ایک پیغام میں کہا کہ 27 اکتوبر کو بھارت نے اپنی مسلح افواج بین الاقوامی قانون کی صریح خلاف ورزی کرتے ہوئے مقبوضہ جموں وکشمیر میں اتاریں،اقوام متحدہ کی بیشتر رپورٹس میں مقبوضہ جموں و کشمیر میں بنیادی انسانی حقوق کی خلاف ورزیوں کی تصدیق کی گئی ہے،

کشمیریوں پر مسلسل ڈھائے جانے والے مظالم اور کشمیر میں نوجوانوں کی ہلاکتوں کے خلاف فوری طور پر ایکشن لینے کی ضرورت ہے۔انہوں نے کہا کہ مقبوضہ جموں و کشمیر کے بہادر اور جرات مند لوگ بین الاقوامی توجہ کے طلب گار ہیں،جب تک اقوام متحدہ کی سکیورٹی کونسل کی قراردادوں کے تحت کشمیریوں کو حق خود ارادیت کا جائز حق نہیں مل جاتا اس وقت تک پاکستان ان کی اخلاقی، سیاسی اور سفارتی مدد جاری رکھے گا۔

Short Link: https://urdu.app.com.pk/urdu/?p=517207