پاکستان کو پولیو سے پاک کرنے کیلئے حکومتی و بین الاقوامی اداروں ،شراکت داروں کی کوششیں قابل ستائش ہیں، وزیراعظم شہباز شریف کا اجلاس سے خطاب

اسلام آباد۔17اپریل (اے پی پی):وزیراعظم محمد شہباز شریف نے کہا ہے کہ پاکستان کو پولیو سے پاک کرنے کیلئے متعلقہ حکومتی اداروں، بین الاقوامی اداروں اور شراکت داروں کی کوششیں قابل ستائش ہیں، انسداد پولیو مہم میں شریک ورکرز مشکل حالات کے باوجود اس موذی مرض کے خلاف جنگ میں ہراول دستے کا کردار ادا کر رہے ہیں،مجھ سمیت پوری قوم کو اپنے محنتی پولیو ورکرز پر فخر ہے۔

جمعرات کو وزیر اعظم آفس کے میڈیا ونگ سے جاری بیان کے مطابق وزیر اعظم محمد شہباز شریف کی زیر صدارت انسداد پولیو بارے جائزہ اجلاس منعقد ہوا۔اس موقع پر اظہار خیال کرتے ہوئے وزیر اعظم نے کہا کہ پاکستان کو پولیو سے پاک کرنے کیلئے متعلقہ حکومتی اداروں، بین الاقوامی اداروں اور شراکت داروں کی کوششیں قابل ستائش ہیں،یقینی بنایا جائے کہ 21 اپریل سے انسداد پولیو کی ہونے والی مہم میں پانچ برس سے کم عمر ہر بچے کو پولیو کی ویکسین پلائی جائے۔

وزیراعظم نے پولیو مہم کے ساتھ ساتھ دیگر خطرناک بیماریوں کے خلاف مدافعت کیلئے معمول کی ویکسی نیشن کی ملک گیر فراہمی کو سو فیصد یقینی بنانے کی ہدایت کرتے ہوئے کہا کہ انسداد پولیو مہم کے حوالے سے گراس روٹ لیول تک آگاہی اور کمیونٹی موبلائزیشن یقینی بنائی جائے،انسداد پولیو مہم میں شریک ورکرز مشکل حالات کے باوجود اس موذی مرض کے خلاف جنگ میں ہراول دستے کا کردار ادا کر رہے ہیں،مجھ سمیت پوری قوم کو اپنے محنتی پولیو ورکرز پر فخر ہے۔

اجلاس میں وزیر اعظم کو 21 سے شروع ہونے والے انسداد پولیو مہم کے بارے بریفنگ دی گئی جس میں بتایا گیا کہ اس مہم میں ساڑھے 45 لاکھ بچوں کو پولیو سے بچاؤ کی ویکسین پلائی جائے گی ، ملک گیرانسداد پولیو مہم میں 4 لاکھ 15 ہزار پولیو ورکر حصہ لیں گے۔ اجلاس کو مزید بتایا گیا کہ وزیر اعظم کی ہدایت پر مہم کی تھرڈ پارٹی ویلیڈیشن 28 سے 30 اپریل کو مکمل کر لی جائے گی۔ملک میں گزشتہ انسداد پولیو مہمات کے نتائج سے آگاہ کرتے ہوئے بتایا گیا کہ 10 فروری 2025 سے اب تک ملک میں ایک بھی پولیو کا کیس رپورٹ نہیں ہوا جبکہ انسداد پولیو مہمات کی کولڈ چین ٹریکنگ کو ڈیجیٹل نظام کے تحت مانیٹر کیا جارہا ہے۔

اجلاس میں وفاقی وزیرقومی صحت سید مصطفی کمال، وزیراعظم کی پولیو کیلئے خصوصی نمائندہ عائشہ رضا فاروق، صوبائی وزیر صحت سندھ ڈاکٹر عذرا فضل، چاروں صوبوں، آزاد کشمیر و گلگت بلتستان کے چیف سیکرٹریز، اور بین الاقوامی شراکت داروں کے نمائندوں کے ساتھ ساتھ متعلقہ سینئرحکام نے شرکت کی۔

Short Link: https://urdu.app.com.pk/urdu/?p=583386