اسلام آباد۔10اپریل (اے پی پی):وفاقی وزیر منصوبہ بندی ، ترقی و اصلاحات احسن اقبال نے کہا ہے کہ پاکستان کے لئے ایک مضبوط قومی برانڈ اور شناخت تشکیل دینا وقت کی اہم ضرورت ہے، کارپوریٹ سیکٹر اور صنعتیں پاکستان کی مشترکہ قومی شناخت اجاگر کرنے میں کردار ادا کریں، پاکستان کی ثقافتی پہچان کے لئے مزید کام کرنے کی ضرورت ہے۔
ان خیالات کا اظہار انہوں نے جمعرات کو نیشنل سینٹر فار برانڈ ڈویلپمنٹ (این سی بی ڈی) کے قیام پر مشاورتی اجلاس کی صدارت کرتے ہوئے کیا۔ اجلاس میں نجی اداروں کے سربراہان اور برانڈنگ ماہرین نے شرکت کی۔ وفاقی وزیر احسن اقبال نے کہا کہ پاکستان کے لئے ایک مضبوط قومی برانڈ اور شناخت تشکیل دینا وقت کی اہم ضرورت ہے، قومی برانڈنگ کے لئے کارپوریٹ سیکٹر، صنعتوں اور قومی سٹیک ہولڈرز کی مشترکہ کاوشیں درکار ہیں۔
انہوں نے کہا کہ ہماری قومی شناخت ہماری مصنوعات میں جھلکتی ہے، اپنی مصنوعات کو فروغ دے کر ہم دراصل پاکستان کے قومی برانڈ کو فروغ دے رہے ہیں، ہمیں اپنی الگ شناخت اور برانڈ خود بنانا ہوگا۔ احسن اقبال نے کہا کہ کارپوریٹ سیکٹر اور صنعتیں پاکستان کی مشترکہ قومی شناخت اجاگر کرنے میں کردار ادا کریں، پاکستانی کی ثقافتی پہچان کے لئے مزید کام کرنے کی ضرورت ہے۔
انہوں نے کہا کہ ہمیں عالمی سطح پر اپنا مثبت تشخص بنانے کے لئے اپنی برینڈنگ کرنا ہو گی، ہمیں اپنے ملک کی بدخوئی سے پرہیز کرنا ہو گا، اگر کسی اچھے گھر کا فرد ہو تو وہ ہمیشہ کوشش میں رہتا ہے کہ میں کوئی ایسا کام نہ کروں جس سے اس کے خاندان کی بدنامی ہو، مگر یہاں ملکی سطح پر ہر دوسرا بندہ اپنے ملک کی برائی کرتا ہوا پایا جاتا ہے، ضروری ہے کہ عالمی سطح پر ہم ایک مضبوط قومی برانڈ کی صورت میں اپنا اور اپنی مصنوعات کا تشخص اجاگر کریں۔
Short Link: https://urdu.app.com.pk/urdu/?p=580300
