راولپنڈی۔6مارچ (اے پی پی):پریذیڈنٹ ٹرافی گریڈ ون کرکٹ ٹورنامنٹ کے فائنل میچ کے دوسرے روز پی ٹی وی کی ٹیم سٹیٹ بینک کے خلاف اپنی پہلی اننگز میں 317 رنز بنا کر آؤٹ ہو گئی۔ وقار حسین اور محمد شہزاد نے سنچریاں سکور کیں۔ سٹیٹ بینک نے کھیل کے اختتام پر اپنی دوسری اننگز میں ایک وکٹ کے نقصان پر 37 رنز بنا لیے۔
راولپنڈی کرکٹ سٹیڈیم میں پنک بال سے کھیلے جانے والے اس نائٹ فائنل میں پی ٹی وی نے اپنی پہلی اننگز 49 رنز 3 کھلاڑی آؤٹ پر شروع کی تو محمد محسن 36 اور تیمور خان 9 رنز بنا کر آؤٹ ہو گئے جس کے بعد وقارحسین اور محمد شہزاد نے چھٹی وکٹ کی شراکت میں قیمتی 123 رنز کا اضافہ کیا۔ وقار حسین 11 چوکوں کی مدد سے 106 رنز کی عمدہ اننگز کھیل کر آؤٹ ہوئے۔
محمد شہزاد جنہوں نے سٹیٹ بینک کی پہلی اننگز میں ہیٹ ٹرک سمیت 5 وکٹیں حاصل کی تھیں، بیٹنگ میں بھی ذمہ داری کا مظاہرہ کرتے ہوئے 125 رنز بنائے اور آؤٹ نہیں ہوئے۔ یہ ٹورنامنٹ میں ان کی تیسری سنچری ہے۔ سٹیٹ بینک کی طرف سے نیاز خان ، محمد عباس اور کاشف بھٹی نے تین ، تین وکٹیں حاصل کیں۔ سٹیٹ بینک نے دوسرے روز کھیل کے اختتام پر اپنی دوسری اننگز میں ایک وکٹ کے نقصان پر 37 رنز بنا لیے۔
عمران بٹ 29 اور عمر امین 5 رنز کے ساتھ وکٹ پر موجود ہیں۔ سٹیٹ بینک کی دوسری اننگز میں عرفان خان نیازی کی جگہ ٹیم میں شامل کیے گئے محمد فیضان بغیر کوئی رن بنائے آؤٹ ہو گئے۔ عرفان خان نیازی قومی ڈیوٹی کی وجہ سے اب یہ میچ نہیں کھیل رہے ہیں۔ انہیں دورہ نیوزی لینڈ کے لیے پاکستانی سکواڈ میں شامل کیا گیا ہے۔
Short Link: https://urdu.app.com.pk/urdu/?p=569318
