فیصل آباد ۔ 02 ستمبر (اے پی پی):پنجاب کے مختلف علاقوں میں گاجر کی کاشت کیلئے ستمبر کا دوسرا ہفتہ نہایت موزوں ہے جبکہ گاجر کی پچھیتی کاشت اکتوبر میں بھی جاری رکھی جاسکتی ہے، گاجر سرد آب و ہوا کی فصل ہے لہٰذا بیج کے بہترین اگاؤ کیلئے 7سے 24 ڈگری سینٹی گریڈ مثالی درجہ حرارت ہے تاہم20سے 25 ڈگری سینٹی گریڈبھی زیادہ سے زیادہ پیداوار اور اچھی گاجر لینے کیلئے انتہائی مناسب ہے۔
اسسٹنٹ ڈائریکٹر محکمہ زراعت توسیع فیصل آبادڈاکٹر خالد اقبال نے کہاکہ بوائی سے پہلے اگر بیج 12گھنٹے پانی میں بھگو لیا جائے تو شرح اگاؤ میں اضافہ ممکن ہے جبکہ اچھی قسم کا صحت مند اور زیادہ روئیدگی والا بیج جو جڑی بوٹیوں سے پاک و صاف ہو استعمال کرنا چاہیے۔
انہوں نے کہاکہ تجربات کی روشنی میں 6سے 8 کلو گرام بیج ایک ایکڑ کیلئے کافی ہوتا ہے تاہم اگیتی فصل کی صورت میں شرح بیج 15کلو گرام فی ایکڑ تک بڑھایا جا سکتا ہے۔انہوں نے کہا کہ کاشتکار گاجر کی کاشت کیلئے گہری میرا اور اگیتی پیداوارکیلئے ریتلی میرا زمین کا انتخاب کریں جبکہ چکنی زمین میں گاجر کی کاشت سے اجتناب کیاجائے کیونکہ اس میں کئی جڑوں والی چھوٹی چھوٹی گاجریں بننے کا امکان ہو تاہے جس سے اچھی فصل کی پیداوار بھی متاثر ہوسکتی ہے۔
Short Link: https://urdu.app.com.pk/urdu/?p=385508
