لاہور۔4مارچ (اے پی پی):پنجاب یونیورسٹی اورپنجاب انفارمیشن ٹیکنالوجی بورڈ حکومت پنجاب کے ساتھ ورکنگ ہیومن کیپیٹل کی رجسٹریشن اور آئی ٹی سسٹم کے ذریعے پنجاب یونیورسٹی کے طلبا و طالبات کو روزگار کے مواقع کی فراہمی کیلئے معاہدہ طے پاگیا۔ اس سلسلے میں مفاہمتی یادداشت پر دستخط کی تقریب کا انعقاد وائس چانسلر پنجاب یونیورسٹی آفس کے کمیٹی روم میں ہوا۔
تقریب میں وائس چانسلرپنجاب یونیورسٹی پروفیسر ڈاکٹر محمد علی، ڈائریکٹر آپریشنز آئی ٹی، پنجاب انفارمیشن ٹیکنالوجی بورڈ عاطف حسین، ڈائریکٹر کیرئیر کونسلنگ اینڈ پلیسمنٹ سینٹر ڈاکٹر فوزیہ ہادی علی، ڈائریکٹر ایکسٹرنل لنکجز ڈاکٹر یامینہ سلمان و دیگرنے شرکت کی۔ معاہدے کے مطابق پنجاب یونیورسٹی طلبا کو پنجاب جاب سنٹر پورٹل میں رجسٹر ہونے کی ترغیب دے گی اور موجودہ طلبا اور سابق طلبا کے دستیاب ڈیٹا کے ساتھ ڈیٹا بیس کے انضمام کے لیے پی آئی ٹی بی کے ساتھ تعاون کرے گی۔ پنجاب یونیورسٹی جاب فیئر، ٹیلنٹ ہنٹ سمیت کسی بھی سرگرمی کی منصوبہ بندی کی صورت میں پی آئی ٹی بی کو مطلع کرے گی۔
پنجاب انفارمیشن ٹیکنالوجی بورڈطلبا کو رجسٹریشن اور اس کے فوائد سے متعلق ضروری معلومات فراہم کرے گااور فراہم کردہ ڈیٹا کی رازداری کو یقینی بنایا جائے گا۔ پی آئی ٹی بی پراجیکٹ کی سرگرمیوں کی بروقت تکمیل،رپورٹس کو برقرار رکھنے اور پراجیکٹ کی سرگرمیوں کا ریکارڈ رکھنے کی نگرانی کو یقینی بنائے گا۔دونوں فریق مشترکہ مفادات اور مقاصد کے لیے متحد ہوکر رابطے اور تعاون کو فروغ دیں گے،جو ان کے متعلقہ کاموں کو آگے بڑھائیں گے۔
فریقین ایک دوسرے کو ممکنہ مواقع سے آگاہ رکھیں گے اور وہ تمام معلومات شیئر کریں گے جو ایک دوسرے کے لیے اضافی مواقع کو محفوظ بنانے کے لیے ضروری ہو سکتی ہیں۔ وائس چانسلر پنجاب یونیورسٹی نے کہا کہ ایم او یو طلبا کے لیے مواقع فراہم کرے گا۔ انہوں نے کہا کہ پاکستان میں پنجاب یونیورسٹی کے متعدد آئی ٹی گریجویٹس کلیدی عہدوں پر کام کر رہے ہیں جو کہ فخر کی بات ہے۔
Short Link: https://urdu.app.com.pk/urdu/?p=568680
