لاہور۔16اپریل (اے پی پی):آئی جی پنجاب ڈاکٹر عثمان انور کا پولیس شہدا ءکے اہلخانہ کےلئے اپنی چھت کی فراہمی کا مشن جاری ہے۔ ترجمان کے مطابق آئی جی پنجاب نے فرض کی راہ میں شہادت کا رتبہ پانے والے پولیس اہلکار کی فیملی کو گھر دے دیا،شہید کانسٹیبل محسن عباس کے اہل خانہ کو ایک کروڑ 35 لاکھ روپے مالیت کا گھر خرید کر دیا گیا۔
ترجمان پنجاب پولیس نے بتایا کہ شہید کے اہلخانہ کو ان کی پسند کے مطابق سرگودھا کی بہترین ہائوسنگ سکیم میں گھر خرید کر فراہم کیا گیا، شہید کانسٹیبل محسن عباس نے 2024 میں ڈاکوں سے مقابلے میں کراس فائرنگ سے جام شہادت نوش کیا،شہید کانسٹیبل محسن عباس کے اہلخانہ میں والدین اور ایک بہن شامل ہیں۔آئی جی پنجاب ڈاکٹر عثمان انور کی خصوصی کاوش پر حکومت پنجاب نے شہید کے اہلخانہ کے گھر کےلئے فنڈز جاری کئے،
آئی جی پنجاب ڈاکٹر عثمان انور کا شہید کانسٹیبل محسن عباس کی لازوال قربانی کو خراج عقیدت پیش کیا۔آئی جی پنجاب ڈاکٹر عثمان انور نے کہاکہ کانسٹیبل محسن عباس نے اپنی جان کی پرواہ کئے بغیر فرائض کی ادائیگی کے دوران جام شہادت نوش کیا ہے۔
Short Link: https://urdu.app.com.pk/urdu/?p=582623
