اسلام آباد۔21اپریل (اے پی پی):صدر مملکت آصف علی زرداری نے پوپ فرانسس کے انتقال پر گہرے دکھ اور افسوس کا اظہار کرتے ہوئے آنجہانی پوپ کے بین المذاہب ہم آہنگی، ہمدردی اور پرامن بقائے باہمی کے عزم کو خراج تحسین پیش کیا ہے۔ پیر کو ایوانِ صدر کے پریس ونگ مطابق صدر مملکت نے پوپ فرانسس کے انتقال پر حکومت ِپاکستان اور عوام کی جانب سے ویٹیکن اور پوری کیتھولک کمیونٹی سے تعزیت کا اظہار کیا ۔
انہوں نے کہا کہ پوپ فرانسس کو دنیا بھر میں امن، سماجی انصاف، بین المذاہب مکالمے اور کمزور طبقات کی فلاح و بہبود کی کاوشوں کے لئے یاد رکھا جائے گا۔ صدر مملکت نے کہا کہ پوپ فرانسس امن اور انصاف کی ایک توانا آواز تھے ، پوپ فرانسس نے مختلف مذاہب سے تعلق رکھنے والی کمیونٹیز کو جوڑنے کیلئے کاوشیں کیں۔
صدر آصف علی زرداری نے کہا کہ باہمی افہام و تفہیم کے فروغ کیلئے پوپ فرانسس کی کوششوں کو ہمیشہ یاد رکھا جائے گا۔ انہوں نے کہا کہ پوپ فرانسس کا انتقال نہ صرف مسیحیوں بلکہ مذاہب کے درمیان امن اور مکالمے کی قدر کرنے والوں کے لئےایک عظیم نقصان ہے۔
Short Link: https://urdu.app.com.pk/urdu/?p=585048
