لاہور۔10اپریل (اے پی پی):پنجاب پولیس نے پاکستان سپر لیگ (پی ایس ایل)سیزن 10 کے لئے سیکورٹی انتظامات مکمل کر لئے۔ ترجمان پنجاب پولیس کے مطابق لاہور، راولپنڈی اور ملتان میں میچز کے دوران مجموعی طور پر 21 ہزار سے زائد پولیس افسران و اہلکار سیکورٹی کے فرائض انجام دیں گے، لاہور میں میچز کے دوران 08 ہزار سے زائد افسران و اہلکار سیکورٹی ڈیوٹی انجام دیں گے، راولپنڈی میں میچز کے دوران 05 ہزار، ملتان میں 8 ہزار افسران و اہلکار سیکورٹی ڈیوٹی پر مامور ہونگے۔آئی جی پنجاب کا کہنا ہے کہ پنجاب پولیس کھلاڑیوں، آفیشلز، شائقین کرکٹ کو بھرپور سیکورٹی فراہم کرنے کے لیے پرعزم ہے، پرامن اور محفوظ ماحول میں میچز کا انعقاد یقینی بنائیں گے۔
پاکستان کرکٹ بورڈ، ضلعی انتظامیہ، سیکورٹی ایجنسیز سمیت تمام اداروں سے کوارڈینیشن مکمل ہے، کھلاڑیوں کی رہائش گاہ، روٹس، سٹیڈیمز کے اطراف سرچ، سویپ، کومبنگ اور انٹیلی جنس بیسڈ آپریشنز کیے جائیں۔ آئی جی پنجاب نے کہا ہے کہ میچز کے دوران سیکورٹی ہائی الرٹ، ٹریفک کی روانی برقرار رکھی جائے،سیف سٹیز اتھارٹی کیمروں کی مدد سے سٹیڈیمز، ہوٹلز اور ٹیموں کے روٹ کی مانیٹرنگ یقینی بنائی جائے،ٹریفک کا بلاتعطل بہاو، مناسب پارکنگ یقینی بنانے کیلئے اضافی ٹریفک وارڈنز تعینات کیے جائیں۔
ڈاکٹر عثمان انور نے کہا کہ ڈولفن سکواڈ، پولیس ریسپانس یونٹ، ایلیٹ فورس ٹیمیں میچز کے دوران موثر پٹرولنگ یقینی بنائیں گی،سٹیڈیمز سمیت اردگرد کی بلند عمارات پر پولیس سنائیپرز تعینات کیے جائیں،سٹیڈیمز کے داخلی خارجی راستوں، انٹری گیٹس پر تعینات عملہ شہریوں کے ساتھ خوش اخلاقی سے پیش آئے۔ آئی جی پنجاب نے کہا کہ شہریوں کی آگاہی، ٹریفک روانی برقرار رکھنے کیلئے متعلقہ اضلاع قبل از میچز ٹریفک ایڈوائزری جاری کریں،شائقین کرکٹ محفوظ ماحول میں میچز سے لطف اندوز ہونے کے لئے پنجاب پولیس کی ہدایات پر عمل کریں۔
Short Link: https://urdu.app.com.pk/urdu/?p=580139
