راولپنڈی۔13مارچ (اے پی پی):پی سی بی کے زیر اہتمام قومی ٹی 20 کپ (کل) بروز جمعہ سے اقبال اسٹیڈیم میں شروع ہو گا۔ افتتاحی میچ دفاعی چیمپئن کراچی ریجن وائٹس اور اسلام آباد ریجن کے درمیان کھیلا جائے گا۔ اسی روز بہاولپور ریجن کا مقابلہ ڈیرہ مراد جمالی ریجن سے اسی مقام پر ہو گا۔ پی سی بی کے مطابق ٹورنامنٹ میں 16 ریجنز سے 18 ٹیمیں حصہ لیں گی۔
ان ٹیموں کو چار گروپس میں تقسیم کیا گیا ہے۔ ہر گروپ سے سرفہرست دو ٹیمیں کوارٹر فائنل مرحلے کے لیے کوالیفائی کریں گی جو 23 اور 24 مارچ کو اقبال اسٹیڈیم میں کھیلے جائیں گے۔ سیمی فائنل 26 مارچ کو اسی مقام پر ہوں گے۔ ٹورنامنٹ کا فائنل 27 مارچ کو اقبال اسٹیڈیم میں کھیلا جائے گا۔
فاتح ٹیم کو 50 لاکھ روپے کی انعامی رقم ملے گی جبکہ رنر اپ کو 25 لاکھ روپے ملیں گے۔ اقبال اسٹیڈیم میں 14 سے 20 مارچ تک ہونے والے میچوں میں شائقین کا داخلہ مفت ہو گا۔ 21 سے 27 مارچ تک کے میچز جن میں کوارٹر فائنل، سیمی فائنل اور فائنل شامل ہیں، شائقین کے لیے ٹکٹ ٹی سی ایس ایکسپریس سینٹرز پر دستیاب ہوں گے۔
Short Link: https://urdu.app.com.pk/urdu/?p=572130
