چترال کے غیور لو گ ضلعی انتظامیہ،سکیورٹی فورسز اور دیگر اداروں کے ساتھ سیسہ پلائی ہوئی دیوار کی طرح کھڑے ہیں،انچارج ٹورازم پولیس

چترال ۔9ستمبر (اے پی پی):چترال ٹورازم پولیس اور ڈی پی او لوئر چترال نے کہا ہے کہ چترال کے لوگ غیور ہیں اور یہ ضلعی انتظامیہ،سکیورٹی فورسز اور دیگر اداروں کے ساتھ سیسہ پلائی ہوئی دیوار کی طرح کھڑے ہیں،سیاح بے خوف یہاں آئیں۔ہفتہ کو عوام کے لئے اہم پیغام میں انسپکٹر انچارج ٹورازم پولیس نے کہا کہ چترال کے تمام سیاحتی مقامات اور مارکیٹیں روٹین کے مطابق کھلی ہوئی ہیں اور سیاح آرہے ہیں،تمام سیاح بے خوف و بےفکر ہو کر چترال آئیں۔یہاں کسی قسم کا کوئ مسئلہ نہیں ہے،مقامی پولیس اور ٹورسٹ پولیس سیاحوں کو مکمل تحفظ فراہم کر رہی ہے اور ان کی رہنمائی بھی کر رہے ہیں۔

ڈی پی او لوئر چترال اکرام اللہ خان نے کہا کہ پاک فوج اور فرنٹیئر کور نے بڑی بہادری سے دہشتگردوں کی بزدلانہ کاروائی کو ناکام بنایا، دہشتگردوں کے بزدلانہ حملہ کے بعد تمام اداروں کی مشترکہ کوآرڈینیشن سے چترال میں ہر قسم کی نقل و حرکت پر نظر رکھنے کے لئے پوسٹیں قائم کی گئیں،چترال ایک پرامن علاقہ ہے۔

انہوں نے کہا کہ یہاں تمام سکول، کالجز اور بازار کھلے ہوئے ہیں۔ڈی پی او لوئر چترال نے کہا کہ چترال کے لوگ غیور ہیں اور یہ ڈسٹرکٹ ایڈمنسٹریشن، سکیورٹی فورسز اور دیگر اداروں کے ساتھ سیسہ پلائ ہوئی دیوار کی طرح کھڑے ہیں۔عوام سے گذارش ہے کہ اگر کوئ مشکوک فرد یا چیز نظر آئے تو فوری طور پر متعلقہ تھانہ کو اطلاع دیں۔ چترال پولیس بہت بہادر ہے اور دہشتگردوں کی کسی بھی کارروائی کا مقابلہ کرنے کو تیار ہے اور ان کو ختم کرنے کے لئے کسی بھی حد تک جا سکتے ہیں۔

Short Link: https://urdu.app.com.pk/urdu/?p=388630