کراچی۔21جون (اے پی پی):چیئرمین پاکستان پیپلز پارٹی بلاول بھٹو زرداری نے ککری گرائونڈ لیاری کے نام سے نئے تعمیر شدہ ککری اسپورٹس کمپلیکس کا افتتاح کردیا۔ وزیراعلیٰ ہائوس سے بدھ کو جاری کردہ اعلامیہ کے مطابق چیئرمین بلاول بھٹو زرداری کے ہمراہ آصفہ بھٹو زرداری اور وزیراعلیٰ سندھ سید مراد علی شاہ بھی موجود تھے۔ تقریب میں وزرا شرجیل میمن، اسماعیل راہو، مکیش چائولہ، گیانچند ایسرانی، میئر کراچی مرتضی وہاب، ڈپٹی میئر سلمان مراد ، ایم پی ایز، علاقے کے معززین اور پارٹی کارکنان نے شرکت کی۔ افتتاح کے بعد چیئرمین بلاول بھٹو، آصفہ بھٹو نے محترمہ بینظیر بھٹو کی سالگرہ کا کیک بھی کاٹا ، کیک کاٹنے سے پہلے محترمہ کے ایصال ثواب کیلئے دعا کی گئی۔تقریب ککری اسپورٹس کامپلیکس کے فٹ بال گرائونڈ میں منعقد کی گئی ۔
چیئرمین پیپلز پارٹی بلاول بھٹو نے لیاری کے عوام کو اتنے خوبصورت سپورٹس کمپلیکس کی بحالی پر مبارکباد دی جہاں نوجوانوں کو کھیلوں کےعالمی مقابلوں میں حصہ لینے کیلئے تربیت دی جائے گی۔ یہ کمپلیکس لیاری کے تاریخی علاقے میں واقع ہے جو مقامی کمیونٹیز کیلئے نہایت ثقافتی اہمیت کا حامل ہے، یہ پراجیکٹ صوبائی حکومت کے اس عزم کا منہ بولتا ثبوت ہے کہ گلی محلوں میں معیار زندگی کو بہتر بنانے اور اپنے شہریوں بالخصوص نوجوان نسل کیلئے کھیلوں کی بہتری کو فروغ دیا جائے گا۔
وزیراعلیٰ سندھ نے چیئرمین کو بریفنگ دیتے ہوئے کہا کہ ککڑی گرائونڈ اور آس پاس کا علاقہ طویل عرصے سے سماجی و کھیلوں کی سرگرمیوں کے مرکز کے طور پر کام کرتا رہا ہے ۔ انہوں نے کہا کہ اس علاقے نے آس پاس کی متعدد سہولیات، کاروبار، تعلیمی اداروں اور صحت کی دیکھ بھال کی سہولیات کے ساتھ رہائشیوں کی فلاح و بہبود میں اہم کردار ادا کیا ہے تاہم وقت کے ساتھ نوجوانوں کے مطالبات اور کھیلوں کی وسیع رینج کو پورا کرنے کیلئے ککری گرائونڈ کو اپ گریڈکرنے کی ضرورت تھی۔
مراد علی شاہ نے کہا کہ ککری اسپورٹس کمپلیکس کی اہمیت اور نیبرہڈ امپروومنٹ کی ضرورت کو تسلیم کرتے ہوئے چیئرمین بلاول بھٹو کی ہدایت پر سندھ حکومت نے بحالی کے منصوبے پر کام شروع کیااور مزید کہا کہ اس منصوبے میں زمین کے استعمال کیلئے ایک جامع منصوبہ تیار کرنا اور موجودہ سہولیات کو عالمی معیار کے مطابق بہتر بنانا شامل ہے۔ وزیراعلیٰ سندھ نے کہا کہ اس کے علاوہ قومی و عالمی مقابلوں میں موجودگی کو یقینی بنانے کیلئے نئے انڈور گیمز اور سہولیات کو شامل کیا گیا ہے۔ انہوں نے کہا کہ کراچی نیبر ہڈ امپروومنٹ پروجیکٹ (کے این آئی پی ) نے اس منصوبے پر عمل درآمد کرنے میں کلیدی کردار ادا کیا ہے جس میں تمام اسٹیک ہولڈرز کی مشاورت شامل ہے۔
واضح رہے کہ منصوبہ جنوری 2022میں شروع ہوا اور جون 2023میں 1.365ارب روپے کی لاگت سے مکمل ہوا۔ منصوبے کا دائرہ کار اسپورٹس کمپلیکس پر مشتمل ہے جس میں 18000اسکوائر فٹ کے نقشے پر ایک کثیر المقاصد عمارت ہے جس میں تہہ خانے میں پارکنگ کی 45جگہیں ہیں۔ اپ گریڈ شدہ ککری اسپورٹس کمپلیکس کئی قابل ذکر خصوصیات کا حامل ہے جو کہ اپ گریڈیشن اور اضافی جگہوں کے اضافے کے ساتھ کھیلوں کے تجربے اور کمیونٹی کی مجموعی فلاح و بہبود میں اضافہ کرے گا۔ان خصوصیات میں مندرجہ ذیل شامل ہیں: فٹ بال گرائونڈ کو اپ گریڈ اور بحال کیا گیا جس میں مناسب سطح بندی، اضافی سائز، اور بہتر نکاسی آب کے ساتھ سطح عالمی برانڈ کے جدید ترین مصنوعی ٹرف سے ڈھکی ہوئی ہے۔
گرائونڈ شائقین کو چوبیس گھنٹے کھیلنے کا موقع فراہم کرے گا اور رات کے اوقات میں بھی نوجوانوں کی تربیت کیلئے کھلا رہے گا۔ قومی و عالمی فٹ بال مقابلوں کے دوران بڑے ہجوم کو ایڈجسٹ کرنے کیلئے ایک نئے پویلین کی تعمیر کے ساتھ آرکیٹیکچرل سطح کی بناوٹ والی ٹائلیں فراہم کرکے موجودہ اسٹیڈیموں کی ریٹروفٹنگ کی گئی ہے۔ مذکورہ تمام سہولیات کے ساتھ متعلقہ دفاتر، بیت الخلا، کھلاڑیوں کیلئے چینج رومز وغیرہ کی سہولیات سے لیس ہے۔ ایک نئی کثیر المنزلہ عمارت جس میں انڈور باسکٹ بال کا مقام، 200 لوگوں کیلئے اسٹیڈیم، 45 گاڑیوں کیلئے زیر زمین کار پارکنگ، تمام افراد خاص طور پر معذور افراد کیلئے چینج روم، کشادہ لانجز، منیجر آفس، بڑی گیلریاں، جمنازیم ، کیفے ٹیریا، داخلی راستے، ٹیبل ٹینس کورٹ، کراٹے جمنازیم، باکسنگ جمنازیم، لائبریری، مشین روم اور بہت کچھ سہولیات سے آراستہ ہے۔ فٹ بال گرائونڈ کو گھیرنے والے نئے ٹارٹن جاگنگ ٹریک اور بڑے ہجوم کی موثر گردش کیلئے فٹ پاتھ کی تعمیر کی گئی ہے۔ کراٹے جم کی مکمل ریٹروفٹنگ، بشمول نئے انڈور اسٹیڈیم، دفاتر، ونائل فرش، چھت کی تبدیلی، بیت الخلا، اگواڑے کی بہتری، زمین کی تزئین، اور بہتر رسائی شامل ہے ۔ باکسنگ کے میدان کی جامع ریٹروفٹنگ، تہہ کی بہتری، مرمتی کام، بیٹھنے کی جگہ کی تزئین و آرائش، آرکیٹیکچرل ٹائلز، باکسنگ رنگ، پبلک ایڈریس سسٹم، باتھ روم، رات کے میچوں اور پریکٹس سیشنز کے لیے ایل ای ڈی فلڈ لائٹس، ریلنگ، وینٹیلیشن سسٹم وغیرہ۔ دو پارکوں، پچر پارک اور اللہ رکھا پارک کی بحالی، ریٹروفٹنگ، یوٹیلیٹیز کی تنصیب، اور بیت الخلا کی فراہمی اور انکو عوام کیلئے قابل رسائی بنانا شامل ہے۔
گھاس کے میدان کے ساتھ فٹ بال گرائونڈ کی مشق ، اور رات کے وقت میں کھیلنے کیلئے ایل ای ڈی فلڈ لائٹس کو فٹ بال کے شوقینوں کی ضروریات کو پورا کرنے کیلئے احتیاط سے ڈیزائن کی گئی ہیں۔ حفاظتی باڑ، بانڈری وال، گرائونڈ اور دیگر احاطے کی حفاظت کو یقینی بنانے کیلئے حفاظتی باڑ، بائونڈری وال اور آرکیٹیکچرل اسٹیل گیٹس۔ فلڈ لائٹس اور معاون انفراسٹرکچر کی تنصیب، رات کے میچوں اور پریکٹس سیشنز کی سہولت۔ مکمل پانی کی فراہمی، برساتی پانی کی نکاسی اور سیوریج کا بہترین سسٹم اسپورٹس کمپلیکس کیلئے پائیداری کو فروغ دیتا ہے۔ ان سہولیات کا عوام کیلئے کھلنے سے انتظامیہ ان کے زیادہ سے زیادہ استعمال کا بندوبست کر سکے گی جبکہ سندھ حکومت کو سرمایہ کاری سے عوام کو فائدہ پہنچے گا۔
وزیر اعلیٰ سید مراد علی شاہ نے عوام پر زور دیا کہ وہ ان عوامی و سرکاری اثاثوں کا احترام کریں جو اپ گریڈ کیے جارہے ہیں اور استحکام کیلئے نگرانی کرنے والوں کو چاہئے کہ انہیں اصلی حالت میں برقرار رکھیں تاکہ حکومت سندھ سرمایہ کاری کے ساتھ دیگر شعبوں کو اپ گریڈ کرنے پر توجہ دے سکے۔
