چیئرمین سینیٹ سید یوسف رضا گیلانی کا بھارتی جارحیت کے خلاف مسلح افواج کی کامیاب اور جرات مندانہ آپریشن "بُنیان مرصوص” پر زبردست خراجِ تحسین

اسلام آباد۔10مئی (اے پی پی):چیئرمین سینیٹ سید یوسف رضا گیلانی نے مسلح افواج کے حوصلے، جذبے اور پیشہ ورانہ حکمت عملی کو زبردست الفاظ میں خراجِ تحسین پیش کرتے ہوئے کہا ہے کہ پاکستان ایک پرامن ملک ہے، جو ہمیشہ خطے میں امن، استحکام اور بھائی چارے کا خواہاں رہا ہے ،اگر کسی نے پاکستان کی سالمیت، خودمختاری اور قومی وقار کو چیلنج کیا تو پوری قوم مسلح افواج کے شانہ بشانہ کھڑی ہو گی۔

سینیٹ سیکرٹریٹ میڈیا ڈائریکٹوریٹ سے ہفتہ کو جاری بیان کے مطابق چیئرمین سینیٹ سید یوسف رضا گیلانی نے بھارتی جارحیت کے خلاف مسلح افواج کی کامیاب اور جرات مندانہ آپریشن’’بُنیان مرصوص‘‘ پر خراجِ تحسین پیش کیا اور بھارتی جارحیت کے خلاف پاکستان کی مسلح افواج کی بروقت اور جرات مندانہ کارروائی "آپریشن بُنیان مرصوص” کو قومی تاریخ کا ایک سنہری باب قرار دیا ۔

انہوں نے مسلح افواج کے حوصلے، جذبے اور پیشہ ورانہ حکمت عملی کو زبردست الفاظ میں خراجِ تحسین پیش کیا اور کہا کہ پاکستان ایک پرامن ملک ہے، جو ہمیشہ خطے میں امن، استحکام اور بھائی چارے کا خواہاں رہا ہے ،اگر کسی نے پاکستان کی سالمیت، خودمختاری اور قومی وقار کو چیلنج کیا تو پوری قوم مسلح افواج کے شانہ بشانہ کھڑی ہو گی ۔

چیئرمین سینیٹ نے مزید کہا کہ "آپریشن بُنیان مرصوص” بھارتی اشتعال انگیزی کا ایسا دندان شکن جواب ہے جس کی گونج عالمی ایوانوں تک سنی گئی ۔چیئرمین سینیٹ سید یوسف رضا گیلانی نے کہا کہ بھارت آئندہ پاکستان کی طرف میلی آنکھ سے دیکھنے کی جرات نہیں کرے گا ،اگر دشمن نے دوبارہ کوئی مذموم حرکت کی کوشش کی تو اس بار اور بھی عبرتناک انجام کا سامنا کرنا پڑے گا ۔

چیئرمین سینیٹ نے مسلح افواج کے سپہ سالار اور تمام جوانوں کو خراج تحسین پیش کیا اور کہا کہ قوم اپنے جانبازوں کی جرات، بہادری اور حب الوطنی پر فخر کرتی ہے ،افواج پاکستان نے جس تدبر، حکمت عملی اور موثر آپریشن کے ذریعے دشمن کے ناپاک عزائم خاک میں ملائے، وہ قابلِ تحسین ہے ۔

انہوں نے کہا کہ ملکی سلامتی اور قومی خودمختاری کے تحفظ کے لیے پوری قوم، سیاسی و عسکری قیادت اور تمام ادارے ایک پیج پر ہیں ،ہر محاذ پر دشمن کے خلاف یک زبان اور یک جان ہو کر مقابلہ کریں گے ۔ چیئرمین سینیٹ نے کہا کہ عالمی برادری بھارت کی اشتعال انگیزی اور جارحیت کا نوٹس لے،جنوبی ایشیا میں امن و استحکام کے قیام کے لیے عالمی برادری اپنا کردار ادا کرے ۔

Short Link: https://urdu.app.com.pk/urdu/?p=595257